Բաբայանի հայտարարությունը հարվածի տակ է դրել ադրբեջանական «սև ցուցակում» գտնվողներին․ Աբրահամյան

Արցախից անխոչընդոտ Հայաստան տեղափոխվելու մասին Սամվել Բաբայանի հայտարարությունը հարվածի տակ է դրել Արցախում գտնվող մյուս մարդկանց, հատկապես նրանց, ովքեր Ադրբեջանի ուշադրության կենտրոնում են։ Այս մասին լրագրողների հետ զրույցում անդրադառնալով Արցախի Ախ նախկին քարտուղար Սամվել Բաբայանի՝ Հայաստան տեղափոխվելու մասին հայտարարությանը, ասել է ԱԺ «Պատիվ ունեմ» խմբակցության պատգամավոր Տիգրան Աբրահամյանը։

«Սամվել Բաբայանի հայտարարությունը հարվածի տակ է դրել այն մարդկանց, ովքեր հավանական ադրբեջանական «սև ցուցակներում» էին , և պատահական չէ, որ այդ հայտարարությունից հետո այսօր արդեն բազմաթիվ տեղեկություններ կան տարբեր մարդկանց մեքենաները շատ ավելի խիստ և մի քանի անգամ ստուգելու մասին, նկատելի է, որ որոշ կոնկրետ մեքենաների նկատմամբ կա առանձնահատուկ ուշադրություն»,-  ասել է Տիգրան Աբրահամյանը՝ հավելելով, որ այլ մանրամասներ չի հայտնում, քանի որ վտանգավոր է համարում։

«Երեկվանից ադրբեջանական կողմը որոշակի միջոցառումներ ձեռնարկում է, և դա չի սահմանափակվում Ռուբեն Վարդանյանի հետ կատարվածով։ Ինչ վերաբերում է Ռուբեն Վարդանյանին, բնականաբար, ցանկացած հայի համար, անկախ քաղաքական դիրքորոշումից, մեկ այլ հայի ձերբակալությունը Ադրբեջանի կողմից ոչ միայն խիստ մտահոգիչ է, այլև պետք է բոլորիս մղի շատ ավելի ակտիվ գործողությունների՝ միջազգային կառույցների, տարբեր հիմնական դերակատարների հետ, որովհետև եթե սա չկանխվի, եթե Ադրբեջանի նկատմամբ լրացուցիչ ճնշումներ չլինեն, սա բերելու է նոր ձերբակալությունների»,- ընդգծել է Աբրահամյանը։

Հիշեցենենք՝ երեկ Սամվել Բաբայանն հայտարարել էր, որ Արցախից անխոչընդոտ Հայաստան է տեղափոխվել։ Հավելենք, որ այսօր Ադրբեջանի ՊԱԾ-ն հայտնեց Արցախի նախկին պետնախարար Ռուբեն Վարդանյանի ձերբակալության մասին։