ԵԽ–ն Միջազգային քրեական դատարանին կոչ է արել Ալեքսանդր Լուկաշենկոյին ձերբակալելու օրդեր տալ
Եվրախորհրդարանը Բելառուսի նախագահ Ալեքսանդր Լուկաշենկոյին Ռուսաստանի նախագահ Վլադիմիր Պուտինի հետ միասին ճանաչել է Ուկրաինայի դեմ պատերազմում ներգրավված և Միջազգային քրեական դատարանին կոչ է արել նրա ձերբակալման օրդեր տալ։ Եվրախորհրդարանի անդամներն անհրաժեշտ են համարում Բելառուսի դեմ պատժամիջոցների մեխանիզմներ կիրառել, որոնք գործում են Ռուսաստանի դեմ։
Այս մասին, ինչպես գրում է ուկրաինական «Obozrevatel» պարբերականը, հաղորդվում է համապատասխան բանաձեւում։ Այն ընդունվել է սեպտեմբերի 13-ին Ստրասբուրգում՝ Եվրախորհրդարանի լիագումար նիստի ժամանակ։
Նշված փաստաթուղթը խոսում է նրա պատասխանատվության մասին այս երկրում բնակչությանը ճնշելու և հալածելու համար։ Բացի այդ, Եվրամիության օրենսդրական կազմակերպությունը պնդում է, որ բելառուս քաղաքական գործիչը ճանաչված է որպես Ուկրաինայի տարածքում ռուսական ռազմական հանցագործությունների մեղսակից։
Բանաձեւում թվարկված և մանրամասն նկարագրված են բելառուսական ռեժիմի բազմաթիվ հանցագործություններ։ Այն արձանագրում է այս ռեժիմի ուժերի կողմից իրականացվող հակաուկրաինական քարոզչությանը ատելություն սերմանելու և ակտիվ մասնակցության փաստը։ Բանաձևում նաև նշվում է, որ հենց Ալեքսանդր Լուկաշենկոյի ռեժիմն է թույլտվություն տվել Բելառուսի տարածքից Ուկրաինայի դեմ ագրեսիայի համար և իրականացրել ռուսական զորքերին զինամթերքի և ռազմական տեխնիկայի ուղղակի մատակարարումներ։
«Լուկաշենկոյի անօրինական ռեժիմն ակտիվորեն աջակցում և լիովին մեղսակից է դարձել Ռուսաստանի չարդարացված ագրեսիվ պատերազմին և Ուկրաինայի դեմ ռազմական հանցագործություններին»,- ասվում է փաստաթղթում։
Եվրախորհրդարանի անդամներն իրենց կարծիքն են հայտնել Բելառուսի դեմ պատժամիջոցների կիրառման անհրաժեշտության մասին՝ Ռուսաստանի դեմ կիրառվող միջոցների նման։ Բացի այդ, Եվրախորհրդարանը Միջազգային քրեական դատարանին կոչ է արել Ալեքսանդր Լուկաշենկոյի նկատմամբ ձերբակալության միջազգային օրդեր տրամադրել։ Պատգամավորների կարծիքով՝ Եվրամիության խորհուրդը պետք է ընդլայնի Բելառուսից այն անձանց ցուցակը, որոնց նկատմամբ Եվրամիության պատժամիջոցները կկիրառվեն։
Միևնույն ժամանակ, եվրոպացի խորհրդարանականները նշել են, որ բելառուսների ճնշող մեծամասնությունը չի աջակցում Ուկրաինայի դեմ ագրեսիայի մեջ իրենց երկրի մասնակցությանը։ Նրանք հիշեցրել են, որ Բելառուսի որոշ քաղաքացիներ որոշել են ուկրաինական բանակի կազմում կռվել ռուս ագրեսորի դեմ, մասնավորապես՝ Կաստուս Կալինովսկի գնդի կազմում։
