Ինձ ոչ ոք չի զգուշացրել Փաշինյանի «սև ցուցակում» ընդգրկվելու մասին. Կրիվոպուսկով
«Զվարթնոց» միջազգային օդանավակայանում սահմանապահները վերցրել են Հայաստանի հետ բարեկամության և համագործակցության ռուսական ընկերության ղեկավար Վիկտոր Կրիվոպուսկովի անձնագիրն ու 4 ժամ պահել փակ սենյակում։ Այս մասին նա հայտնել է Sputnik–ին։
«Ամենատհաճն ինձ համար այն է, որ ինձ ոչ ոք պաշտոնապես չի զգուշացրել Փաշինյանի «սև ցուցակում» ընդգրկվելու մասին։ Սահմանապահները Երևանի օդանավակայանում վերցրել են անձնագիրս ու 4 ժամ պահել փակ սենյակում` հայ ժողովրդի համար անցանկալի անձ հայտարարելու համար»,– պատմել է Կրիվոպուսկովը։
Իր խոսքով՝ Հայաստանում հակառուսական տրամադրությունների աճի առումով իրավիճակը բավականին տագնապալի է։
Այսօր ավելի վաղ հայտնել էինք, որ գիշերը Երևանի «Զվարթնոց» օդանավակայանի սահմանապահ ծառայությունը մերժել է Հայաստանում «Ռոսսոտրուդնիչեստվոյի» նախկին ղեկավար Վիկտոր Կրիվոպուսկովի մուտքը ՀՀ։
«Ինձ երկիր չթողեցին, Հայաստանի համար անցանկալի մարդ հայտարարեցին և անձնագիրս խլեցին։ Պաշտոնական թուղթը ցույց չտվեցին, բայց դե ես հասկանում եմ, որ եթե սահմանը չբացեցին ինձ համար, անձնագիրս չվերադարձրին․․․ Ինձ ասացին, որ հենց այսօր վերադառնամ Մոսկվա»,- նշել էր նա։
