«Վագների խմբի» ղեկավար, գործարար Եվգենի Պրիգոժինն առաջին տեսաուղերձն է հրապարակել Ռուսաստանում զինված ապստամբության փորձից և «դեպի Մոսկվա երթից» հետո։ Այն հրապարակվել է «Разгрузка Вагнера» թելեգրամյան ալիքում և պարունակում է կոչ՝ ուղղված նրանց, ովքեր ցանկանում են հավաքագրվել խմբավորման շարքերում:

Պրիգոժինը տեսախցիկի առաջ կանգնած է բաց տարածքում: Դատելով իր խոսքերից՝ նկարահանումն արվել է Աֆրիկայում, իսկ թե որ երկրում՝ չի նշվում։ 

«Մենք աշխատում ենք։ Ջերմաստիճանը +50. Ամեն ինչ այնպես է, ինչպես մենք ենք ցանկանում»,- ասում է գործարարը։ 

Նա հայտնում է, որ այժմ «Վագները» իրականացնում է հետախուզաորոնողական աշխատանքներ և «շարունակում է իրականացնել առաջադրված խնդիրները»։ «Մենք խոստացել ենք, որ կհասցնենք», - հիշեցնում է Պրիգոժինը: Նրա խոսքով՝ ընկերությունը «Ռուսաստանն ավելի հզոր է դարձնում բոլոր մայրցամաքներում, իսկ Աֆրիկան՝ ավելի ազատ»։ 

«Արդարություն և երջանկություն աֆրիկյան ժողովուրդների համար. սարսափեցնում ենք ԴԱԻՇ-ի, Ալ-Քաիդայի և մյուս բանդաներին: Մենք աշխատանքի ենք ընդունում իրական դյուցազունների», - դիմեց Պրիգոժինը նախատեսված լսարանին: 

Ավելի վաղ Լեհաստանի Կրակով քաղաքի բնակիչները հայտնել էին պատերին փակցված կպչուն պիտակների մասին՝ «Վագների խմբին» միանալու կոչերով։ Նրանց բողոքների հիման վրա տեղական իշխանությունները հետաքննություն են սկսել։ Լեհաստանի փոխարտգործնախարար Պավել Յաբլոնսկին ասել է, որ Բելառուսում տեղակայված խմբավորման ստորաբաժանումները փորձել են ներթափանցել երկիր, և Վարշավան ակնկալում է «ներթափանցման նոր փորձեր»: