ԿԸՀ-ում գրանցվել է Երևանի քաղաքապետի ընտրությունների մասնակցության առաջին հայտը

Կենտրոնական ընտրական հանձնաժողովում այսօր գրանցվել է Երևանի ավագանու ընտրությունների մասնակցության առաջին հայտը։ Այսօր հրավիրված ասուլիսի ժամանակ տեղեկությունը հայտնել է ԿԸՀ նախագահ Վահագն Հովակիմյանը։

Նա նշեց, որ առաջինը մուտք է արել «Հայաստանի եվրոպական կուսակցության» փաստաթղթերը (Տիգրան Խզմալյանի կուսակցությունը. խմբ.)։

«Առաջադրումները, ավանդույթի համաձայն, տեղի է ունենում նախավերջին և վերջին օրը։ Այստեղ շատ պրագմատիկ պատճառներ կան, մինչև վերջին օրը փաստաթղթերի հետ կապված հարցեր են ճշգրտում»,–ասել է Հովակիմյանը։

ԿԸՀ նախագահի խոսքով` առաջադրումների հոսքը կլինի այս շաբաթ և կիրակի։

Նշենք, որ օգոստոսի 3–ից մեկնարկել է աշնանը սպասվող ավագանու ընտրություններին մասնակցող կուսակցությունների և կուսակցությունների դաշինքների առաջադրման պաշտոնական գործընթացը, որը կտևի 10 օր և կավարտվի օգոստոսի 13-ին: Ավագանու ընտրություններին մասնակցելու ցանկություն ունեցող քաղաքական ուժերը և դաշինքները 10-օրյա ժամկետում ԿԸՀ պետք է ներկայացնեն գրանցման համար անհրաժեշտ փաստաթղթերը: Իսկ օգոստոսի 23-ից էլ արդեն կմեկնարկի նախընտրական քարոզարշավը։