ԵՄ-ն դադարեցնում է Նիգերի հետ համագործակցության բոլոր տեսակները. Բորել
Եվրամիությունը (ԵՄ) դադարեցրել է Նիգերի հետ համագործակցության բոլոր տեսակները: Այս մասին հայտարարել է ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը: Տեղեկությունը հայտնում է «Interfax»-ը։
«Մենք անմիջապես դադարեցրել ենք Նիգերի հետ ցանկացած համագործակցություն այս փուլում: Հստակեցնեմ, որ սա ներառում է նաև համագործակցություն միգրացիոն հոսքերի հետ կապված (...): Այո, բոլոր գործողություններն այժմ կասեցված են՝ ֆինանսական աջակցություն, քաղաքացիական առաքելություններ, համագործակցություն անվտանգության հարցերի շուրջ»,- ասել է Եվրամիության ներկայացուցիչը։
Բորելը նշել է, որ Բրյուսելն աջակցում է Արևմտյան Աֆրիկայի երկրների տնտեսական համայնքի (ECOWAS) բոլոր գործողություններին՝ Նիգերի գահընկեց արված նախագահ Մուհամեդ Բազումի իշխանությունը վերականգնելու համար և չի ճանաչում ռազմական հեղաշրջումը։ Նա ընդգծել է, որ տարածաշրջանային կազմակերպության ղեկավարների հանդիպումը «որոշիչ է լինելու»։
«Մենք չենք աշխատում Նիգերի ներկայիս անօրինական իշխանությունների հետ»,- հավելել է նա։
«Սա առանցքային խաղացող է տարածաշրջանում։ Ինչ էլ որ լինի ԷԿՈՎԱՍ-ի որոշումը, այն կիրականացվի։ Մենք կօգնենք լուծում գտնել»,- ասել է եվրոպական դիվանագիտության ղեկավարը՝ պատասխանելով Նիգերում ռազմական միջամտության հեռանկարների մասին հարցին։
Հիշեցնենք, որ հուլիսի վերջին Նիգերում ռազմական հեղաշրջում է տեղի ունեցել:
