Նիգերի խռովարարները նոր վարչապետ են նշանակել
Նիգերի խռովարարները վարչապետ են նշանակել տնտեսագետ և ֆինանսների նախկին նախարար Ալի Մաման Լամին Զեյնին։
«Հայրենիքի պաշտպանության ազգային խորհրդի նախագահը, պետության ղեկավարը որոշում է, որ Լամին Զեյն Ալի Մահամանը նշանակվի վարչապետ»,- ասվում է հայտարարության մեջ, որն ընթերցվել է Նիգերի պետական RTN հեռուստատեսությամբ։
Ըստ ActuNiger-ի՝ Լամին Զեյնը ներկայումս Աֆրիկյան զարգացման բանկի ներկայացուցիչն է Չադի մայրաքաղաք Նջամենայում, իսկ նախկինում նույն պաշտոնը զբաղեցնում էր Կոտ դ՛Իվուարում և Գաբոնում։
Հուլիսի վերջին Նիգերի զինվորականները ազգային հեռուստատեսությամբ հայտարարեցին նախագահ Մուհամեդ Բազումին իշխանությունից հեռացնելու մասին։ Նախագահական գվարդիայի հրամանատար, գեներալ Աբդուրախման Չիանին պետական հեռուստատեսությամբ հանդես է եկել որպես հեղաշրջման մասնակիցների կողմից ստեղծված «Հայրենիքի պաշտպանության ազգային խորհրդի» ղեկավար։ Արևմտյան երկրների մեծ մասի ղեկավարները դատապարտել են հեղաշրջումը։
