Ապստամբները տեղյակ են վտանգների մասին, եթե «Վագներին» հրավիրեն երկիր. Նուլանդը Նիգերում է
ԱՄՆ փոխպետքարտուղարի պաշտոնակատար Վիկտորյա Նուլանդը Նիգերում է։ Նա բանակցություններ է վարել ռազմական առաջնորդների հետ, որոնք ավելի վաղ իշխանությունից հեռացրել էին երկրի նախագահին: Նուլանդը լրագրողներին ասել է, որ ապստամբները տեղյակ են «ինքնիշխանության վտանգների» մասին, եթե «Վագներին» հրավիրեն։
Նուլանդը լրագրողներին հայտնել է, որ «բանակցությունները շատ անկեղծ էին և երբեմն բավականին բարդ»:
«Մենք ցանկանում էինք բաց խոսել նրանց հետ, ովքեր պատասխանատվություն են կրում ժողովրդավարական կարգին ուղղված մարտահրավերի համար, տեսնել, թե արդյո՞ք կարող ենք փորձել խնդիրները լուծել դիվանագիտական ճանապարհով», - ասել է նա։
Ակնկալվում է, որ այսօր Նիամեյում բանակցություններին կմիանան Արևմտյան Աֆրիկայի տնտեսական համագործակցության ասոցիացիայի, Աֆրիկյան միության և ՄԱԿ-ի ներկայացուցիչները։
Հիշեցնենք՝ հուլիսի 27-ի գիշերը Նիգերի զինվորականները հայտարարեցին նախագահ Մուհամեդ Բազումի պաշտոնանկության և իշխանությունը «Հայրենիքի փրկության ազգային խորհրդին» փոխանցելու, ինչպես նաև սահմանների փակման, սահմանադրության կասեցման և ցանկացած քաղաքական կուսակցության գործունեության արգելքի մասին:
Մալիի և Բուրկինա Ֆասոյի իշխանությունները սպառնացել են, որ արտաքին միջամտությունը Նիգերի գործերին կդիտարկեն որպես իրենց դեմ պատերազմի հայտարարություն։
