ՏԵՍԱՆՅՈՒԹ. «Սա հնարավոր է հերթական փափուկ բարձն է». Անհետ կորածի ծնող

Առավոտյան ժամը 10-ին պարալիզացրեցինք Բաղրամյան պողոտա-Պռոշյան փողոց խաչմերուկը, հիմա փոխոստիկանապետը ցանկություն հայտնեց հանդիպել մեզ հետ, քննարկել մեր խնդիրը, որոշեցինք այս անգամ էլ գնալ, հասկանալ, թե մեզ ինչ են առաջարկում: Այս մասին, այսօր՝ հուլիսի 26-ին, Բաղրամյան պողոտայում բողոքի ակցիայի ժամանակ նշել է անհետ կորած զինծառայողներից Վարդան Ադոյանի մայրը՝ Անահիտ Ադոյանը:

«Մենք դա էլ գիտենք, որ սա հնարավոր է հերթական փափուկ բարձն է, բայց մենք նորից ենք գալու: Այնպես չէ, որ գնացինք ու հետ չենք գալու: Փոխոստիկանապետն ասաց՝ եկեք գնանք ինձ մոտ, նստենք, զրուցենք, հասկանանք, քննարկենք: Մյուս կողմից իրենց ասածն այն էր, որ այստեղից ձեզ կհավաքենք, կտանենք: Մենք չենք վախենում, բայց չենք ուզում անախորժություն լինի: Ասենք իմ թեւերը ծալեն, տանե՞ն, ինչքանով է դա հարգի:

Մենք այս պահին այստեղ ենք, մեկ ժամից կարող ենք մի ուրիշ տեղ լինել, երկու ժամից այլ տեղում լինենք, լուսադեմին Երեն-Հոկտեմբերյան միջպետական ճանապարհը փակենք: Այնպես չէ, որ մենք մեր քայլերը ասելու ենք: Պարզապես, մարդը բարեհամբույր գտնվեց, ասաց՝ գնանք իմ մոտ զրուցենք: ՕԿ, գնանք, զրուցենք: Երեւի ուզում են այս պիկը բացվի: Մեզ համար դժվար չէ էլի փակել ճանապարհը»,-ասել է նա՝ հավելելով, որ իրենց հիմնական պահանջը Նիկոլ Փաշինյանի հետ հանդիպումն է:

Նրանց խոսքով, եթե Նիկոլ Փաշինյանն իրենց ընդամենը 10 րոպեով ընդուներ, նման վիճակ չէր լինի։

Նշենք, որ ակցիային մասնակցում են Էջմիածնի N զորամասի («քիմիկների» զորամաս) զինծառայողների ծնողները, որոնց զավակներին 2021 թվականի հոկտեմբերի 21-ին տեղափոխել էին Արցախ մարտական առաջադրանքի և սխալ հրամանի  պատճառով նրանք հայտնվել էին շրջափակման մեջ ու անհետ կորել:

Նրանք փակել են Բաղրամյան պողոտա-Պռոշյան փողոց խաչմերուկը եւ պահանջում են հանդիպում Նիկոլ Փաշինյանի հետ: Նրանք մեկ շաբաթ առաջ էին Նիկոլ Փաշինյանի հանդիպելու պահանջով բողոքի ակցիա արել։ Փաշինյանը նրանց, սակայն, այդպես էլ չէր ընդունել։