Շվեդիայում Ղուրանի հերթական հրապարակային այրումը կդժվարացնի երկրի անդամակցումը ՆԱՏՕ-ին․ Թուրքիա

Թուրքիայի արդարադատության նախարար Յըլմազ Թունչը հայտարարել է, որ Շվեդիայում Ղուրանի հրապարակային այրման հետ կապված հերթական միջադեպը կդժվարացնի երկրի հետագա մերձեցումը ՆԱՏՕ-ի հետ։ 

«Հատկապես ՆԱՏՕ-ի գագաթնաժողովից առաջ Շվեդիայի իշխանությունները, որոնք ցանկանում են լինել Թուրքիայի դաշնակիցները, պետք է վերջ տան անօրինականություններին և սադրանքներին, որոնք տեղի են ունենում իրենց երկրում ազատության հովանու ներքո, անհրաժեշտ է ձեռնարկել անհրաժեշտ միջոցներ»,- թուրք նախարարի խոսքերը մեջբերել է EFE լրատվական գործակալությունը: 

Թուրքիայի արդարադատության նախարարը «սկանդալային» է անվանել շվեդական ոստիկանության դիրքորոշումը, որը թույլ է տվել չորեքշաբթի օրը Ստոկհոլմի մզկիթի մոտ Ղուրանի այրումը։ 

«Կրոնի ազատությունը մարդու հիմնարար իրավունքն է, և հավատացյալների դեմ հարձակումները չեն կարող արդարացվել խոսքի ազատությամբ», - ասել է նա,- «Ոչ մի իրավական որոշում չի կարող արդարացնել նման հարձակումը: Ոչ մի ժողովրդավարական սահմանադրական պետություն չի կարող համակերպվել նման իրավիճակի հետ»: 

Իր հերթին, Թուրքիայի արտգործնախարար Հաքան Ֆիդանը այս միջադեպն անվանել է «անարգ»՝ հիշեցնելով, որ դա տեղի է ունեցել մահմեդական զոհաբերության տոնի առաջին օրը։ 

«Անընդունելի է, որ նման հակաիսլամական գործողությունները թույլատրվում են արտահայտվելու ազատության հովանու ներքո: Նման հրեշավոր գործողությունների վրա աչք փակելը հավասարազոր է հանցագործության մեղսակցությանը», - ասել է Ֆիդանը: 

Չորեքշաբթի ավելի վաղ Ստոկհոլմում մզկիթի դիմաց Ղուրան են այրել, ակցիան տեղի է ունեցել մոտ 200 հոգու ներկայությամբ՝ ոստիկանական հսկողության ներքո։ 

Շվեդիան հավակնում է ՆԱՏՕ-ին անդամակցելուն, սակայն նման միջադեպերի պատճառով Թուրքիան կտրականապես դեմ է դրան։