Ադրբեջանը ցանկանում է վերացնել տարածաշրջանում հայկական ներկայացվածությունը. Մարգարյան

Ադրբեջանի կողմից հայկական մշակութային կոթողների ոչնչացումը տարածաշրջանում հայկական ներկայացվածության համակարգված վերացման քաղաքականության մասն են։ 

«Մշակութային ժառանգության պաշտպանությունը զինված հակամարտությունների ընթացքում» խորագրով ՄԱԿ Անվտանգության խորհրդի շրջանակներում տեղի ունեցած թեմատիկ քննարկման ժամանակ հայտարարել է ՄԱԿ-ում Հայաստանի մշտական ներկայացուցիչ Մհեր Մարգարյանը։

Տեղեկությունը հայտնում է ՄԱԿ-ում Հայաստանի մշտական ներկայացուցչության ֆեյսբուքյան էջը։

Դեսպանն ընդգծել է, որ հայկական մշակութային ժառանգության դեմ Ադրբեջանի ավելի վաղ շրջանի ոտնձգությունները ևս փաստագրված են` օրինակ բերելով Նախիջևանի հայկական միջնադարյան եկեղեցիների և 5000-ից ավել խաչքարերի ոչնչացումը։

«Քննարկման մասնակիցների ուշադրությունն է հրավիրվել նաև 2021թ. դեկտեմբերին Հայաստանի հայցի հիման վրա Արդարադատության միջազգային դատարանի կողմից ընդունված հրատապ միջոցներ կիրառելու վերաբերյալ որոշման վրա, որը պարտավորեցնում է Ադրբեջանին «ձեռնարկել բոլոր անհրաժեշտ միջոցները՝ կանխելու և պատժելու վանդալիզմի ու պղծման գործողությունները»,– ասված է հաղորդագրությունում։

ՀՀ մշտական ներկայացուցիչը շեշտել է, որ Հայաստանը շարունակաբար կոչ է արել ՅՈՒՆԵՍԿՕ-ին փաստահավաք առաքելություն ուղարկել Լեռնային Ղարաբաղ և հարակից տարածքներ, այնինչ Ադրբեջանը մշտապես խոչընդոտել է տեղում փաստերի անկախ և անաչառ գնահատական տալու միջազգային կառույցների ջանքերը։