ՏԵՍԱՆՅՈՒԹ․ Ինչպես են ոստիկանները ներխուժել «Պոլիգրաֆ» ակումբ․ թմրամիջոցներ են հայտնաբերվել
«Պոլիգրաֆի» թիմը հայտարարություն է տարածել անցած գիշեր ակումբում տեղի ունեցած ոստիկանական ռեյդի վերաբերյալ։
«Անցած գիշեր՝ ժամը 1-ի մոտակայքում, ՀՀ ոստիկանությունը առանց որևէ իրավական հիմք ներկայացնելու ներխուժել է Պոլիգրաֆ: Ակումբում բոլորին պառկացրել են հատակին և բռնի ուժով տարել ոստիկանական բաժանմունք։ Մեր աշխատակազմն ու այցելուները ենթարկվել են դաժան ծեծի և խուզարկվելու համար մերկացվել ոստիկանության բաժնում։
Մենք արդարություն ենք պահանջում բոլոր տուժածների համար։
Սա հարձակում է ոչ միայն Poligraf-ի, այլև ամբողջ ակումբային համայնքի վրա: Մենք բոլորս՝ որպես եզակի մշակութային ու ստեղծագործական ոլորտի մի մաս, վտանգի տակ ենք: Խոսքը միայն պարելու կամ ինքնարտահայտվելու մեր իրավունքի մասին չէ, այլ՝ մեր հասարակության բուն էության։ Մենք մի համայնքի մասն ենք, որը խթանում է ստեղծարարությունը, բազմազանությունն ու ներառականությունը։
Այժմ, սակայն, մենք հարձակման տակ ենք։ Այն ուժերը, որոնք ձգտում են ճնշել մեր ապրելակերպը, սպառնում են մեր գոյությանը։ Նրանք փորձում են լռեցնել մեր ձայնը, խեղդել մեր ստեղծարարությունը, պարտադրել մեզ իրենց նեղ աշխարհայացքը: Մենք չենք կարող թույլ տալ, որ սա տեղի ունենա։
Կոչ ենք անում բոլոր ակումբներին ու ժամանցային տարածքներին, տեղի ու միջազգային հանրության ներկայացուցիչներին, արվեստագետներին և բոլոր նրանց, ովքեր կիսում են մեր արժեքները՝ ոտքի կանգնել մեզ հետ և բարձրաձայնել այս անարդարության դեմ: Ստորագրեք կից խնդրագիրը և տարածեք մեր խոսքերը։
Պահանջում ենք, որ Poligraf-ի ապօրինաբար պլոմբված դռները բացվեն։
Մեր հետագա գործողությունների մասին շուտով կտեղեկացնենք բոլորիդ»։
Նշենք, որ ֆեյսբուքյան օգտատեր Հայկ Հովհաննիսյանը տեսանյութ է հրապարակել և նշել, որ տեսակադրերը ոստիկանության գործողությունների պահից է։
Shamshyan.com-ն էլ ոստիկանության ծառայողները նշված վայրից մոտ 40 անձ են բերման ենթարկել Ոստիկանության Կենտրոնական բաժին, որոնցից մեծ մասի մոտ հայտնաբերվել են տարբեր տեսակի թմրամիջոցներ, կասկածելի առարկաներ, սառը զենքեր։
Երբ ոստիկանները ստացված օպերատիվ տվյալներով ժամանել են նշված ակումբ և սկսել են գործողություններ իրականացնել, անվտանգության մի քանի աշխատակիցներ, ովքեր իրենց դրել էին «Ռեմբոյի» տեղը, փորձել են խոչընդոտել ոստիկանների օրինական գործողություններին։ Սակայն երբ ոստիկաններից մի երկուսը փռշտացել են, անվտանգության առյուծ կտրող տղերքը դարձել են «խոնարհ հարս»։
Լրատվամիջոցի տեղեկություններով՝ բերման ենթարկվածների մեջ կան նաև հասարակությանը հայտնի անձանց բարեկամներ, ովքեր փորձել են իրենց բարեկամների միջոցով հասնել նրան, որ ոստիկանները նրանց չտեղափոխեն Ոստիկանություն, սակայն այդ ամենը հոդս է ցնել՝ խելոք, շարքով, կարգով տեղափոխվել են ոստիկանություն։
