Բրազիլիայի նախագահը Ուկրաինային առաջարկել է Ղրիմը հանձնել Ռուսաստանին
Բրազիլիայի նախագահ Լուիս Ինասիո Լուլա դա Սիլվան հայտարարել է, որ «հանուն աշխարհում խաղաղության» Ուկրաինան պետք է Ղրիմի թերակղզին զիջի Ռուսաստանին։ Նրա կարծիքով՝ դա կարող է վերջ դնել լայնամասշտաբ պատերազմին։ Նա այս կարծիքն է հայտնել ապրիլի 6-ին լրագրողների հետ հանդիպմանը։ Նրա խոսքերը մեջբերել է Le Figaro-ն, փոխանցում է obozrevatel.com-ը։
Դա Սիլվան, մասնավորապես, խոստովանել է, որ Ռուսաստանի ղեկավար Վլադիմիր Պուտինը չի կարող գրավել Ուկրաինայի տարածքը։ Ուստի նա Կիևին առաջարկում է զիջումների գնալ և Կրեմլի հետ խոսել 2014 թվականից օկուպացված Ղրիմի մասին։
«Միգուցե մենք կքննարկենք Ղրիմի հարցը, բայց այն, որ նա (խմբ․ Պուտինը) լրացուցիչ ներխուժել է, նա պետք է վերանայի։ Զելենսկին նույնպես չի կարող ամեն ինչ ցանկանալ... Աշխարհին խաղաղություն է պետք... Մենք պետք է լուծում գտնենք»,- ասել է Բրազիլիայի նախագահը։
