ՏԵՍԱՆՅՈՒԹ. Ադրբեջանը իրադրությունը զարգացնում է դեպի նոր էսկալացիա. Փաշինյան
Միջազգայնորեն ձեռք բերված պայմանավորվածությունների անպատիժ խախտումներն Ադրբեջանի կողմից նան քաջալերում են գնալ նորանոր սադրանքների: Այս մասին այսօր՝ մարտի 23-ին, կառավարության նիստում նշեց ՀՀ վարչապետ Նիկոլ Փաշինյանը:
«Նման մի հրեշավոր սադրանք տեղի է ունեցել երեկ, երբ ադրբեջանական կողմը նպատակային, դիպուկահար կրակոցով սպանել է ՀՀ ԶՈՒ զինծառայող Արշակ Սարգսյանին:
Ցավակցություն հայտնելով զոհված զինծառայողի ծնողներին, հարազատներին, միջազգային հանրության ուշադրությունն եմ հրավիրում այն ակնհայտ փաստի վրա, որ Ադրբեջանը իրադրությունը զարգացնում է դեպի նոր էսկալացիա: Սա ավելի է հիմնավորվում Ադրբեջանի պետական մակարդակով վարվող, այսպես կոչված, «Արեւմտյան Ադրբեջանի» անհեթեթ խոսույթով, որը Հայաստանի տարածքի նկատմամբ ոտնձգության բացահայտ ակտ է:
Իսկ ընդհանուր առմամբ, այս խոսույթը եւս մեկ անգամ ի ցույց է դնում, որ մեր կառավարությունը հենց սկզբից ճիշտ է ընթերցել Ադրբեջանի ուղերձները եւ այս շարունակական, Հայաստանի գոյության իրավունքը կասկածի տակ դնող քաղաքականությունն ու խոսույթն է ԼՂ հակամարտության չկարգավորման պատճառը»,-ասաց նա:
Փաշինյանը հվելեց, որ Ադրբեջանը հիմա էլ նոր մեղադրանք է մոգոնել ընդդեմ Հայաստանի, թե Հայաստանը մոնոէթնիկ երկիր է եւ ՀՀ-ում իբր ազգային փոքրամասնություններ չկան.
«Նախ նման ձեւակերպումները ՀՀ ներքին գործերին կոպիտ միջամտություն է, եւ Հայաստանում ոչ միայն կան ազգային փոքրամասնություններ, այլեւ նրան մանդատներ ունեն ՀՀ ԱԺ-ում եւ դա երաշխավորված է Սահմանադրությամբ:
Եթե սա միջամտություն չէ երկրի ներքին գործերին, ուրեմն արձանագրենք, որ Ադրբեջանում ոչ միայն մամուլի, ընդդիմության, այլեւ ազգային փոքրամասնությունների ներկայացուցիչների նկատմամբ հետապնդումները կրում են համակարգային բնույթ: Ադրբեջանում ազգային փոքրամասնությունների շահերը պաշտպանող լիդերների սպանությունների, բանտարկությունների մասին նյութերով հեղեղված է միջազգային մամուլը:
Ընդ որում շատ դեպքերի մասին պատմում են ականատեսները, խոշտանգումների, հետապնդումների ենթարկված ակտիվիստները կամ սպանված ակտիվիստների ընտանիքների անդամները: Ադրբեջանը գուցե բարի կամք դրսեւորի եւ Միլի Մեջլիսում ազգային փոքրամասնությունների համար նախատեսված պատգամավորական քվոտաներ սահմանի ազգային փոքրամասնությունների համար եւ դա երաշխավորի Սահմանադրությամբ»,-ասաց վարչապետը:
