Ես ոգեւորված չեմ ՌԴ որոշ պաշտոնյաների հայտարարություններով եւ անթույլատրելի եմ համարում, երբ ահաբեկչին եւ ահաբեկչի թիրախին դնում են նույն հարթության վրա եւ երկուսին էլ հանդարտության կոչ են անում: Այս մասին լրագրողներին ասել է ՀՀ երրորդ նախագահ Սերժ Սարգսյանը: 

«Դա շատ նման է նրան, որ 1980-ականների վերջին ԽՍՀՄ գերագույն խորհրդի նախագահ կար, ու երբ ժողովուրդներն իրար հետ կռվում էին, ասում էր՝ կլուբնիկի  պատճառով են իրար հետ կռվում: Մյուս կողմից էլ մենք գոնե երեկ տեսանք Ռուսաստանի ՊՆ հասցեական հայտարարությունը: Իսկ ուրիշ ավելի հստակ հայտարարություններ եղա՞ն: Այսօր տեսա, որ Ֆրանսիայի ԱԳՆ-ն եւս հասցեական  հայտարարություն արեց, բայց մեր տարածաշրջանում կա ԵՄ հատուկ ներկայացուցիչ, ով պարտավոր է  այդ իրադարձություններից մանրամասն տեղյակ լինել: Իսկ նա ի՞նչ ասաց:  Ի՞նչ է նշանակում արյունալի իրադարձություններ: Դա ի՞նչ ասելու բան էր: Ուզում եմ ասել, որ ամեն ինչը պետք է միշտ դիտարկել համեմատության մեջ: 

Լավ, ռուս խաղաղապահներին քննադատում ենք, ասում ենք՝ գնացեք: Կա՞ մեկ այլ երկիր, որ պատրաստ է խաղաղապահներ բերել: Եթե չկա, ինչո՞ւ են ավել պակա սխոսում: Իսկ ԼՂՀ-ն այսօր ի վիճակի՞ է դիմակայելու Ադրբեջանին առանց խաղաղապահների, հտկապես, որ Հայաստանն արդեն ձեռքերը լվացել է, ՀՀ-ն այլեւս իրեն չի համարում անվտանգության երաշխավոր: Բա էդ 120 հազարը ո՞նց պետք է դիմակայի 10 մլն-ին: Ուրեմն անհրաժեշտություն է այսօր խաղաղապահների առկայությունն այնտեղ»,- ասել է նա։ 

Նրա խոսքով, մենք միշտ պետք է հիշենք, որ որեւէ դաշնակցային հարաբերություն հարաբերություն չէ միակողմանի օգնության համար. «Սովորական հարաբերություններում էլ միայն այն ընկերությունն է ամուր, երբ ընկերակցող կողմերը գիտակցում են, որ ընկերությունը նաեւ փոխադարձ պարտավորություն է: Ոչ թե դու միշտ տուր-տուր, իսկ ես ձեռքերս ծալեմ, գնամ մեկ ուրիշի հետ սկսեմ խոսել: Պետք է հասկանալ, որ միջազգային քաղքականությունը շատ կոշտ, դաժան կողմեր ունի: Երբ տեսնում են, որ մարդը տեղից բան չի հասկանում, անմիջապես կուլ են տալիս: Այո, Ռուսաստանը հիմա էլ մեր դաշնակիցն է, իսկ մեր կողմից տեսնո՞ւմ եք այդպիսի դաշնակցային հարաբերություններ»։