«Բաքվի բանտում հայ ռազմագերիներին հանդիպելու հնարավորության կա, որից պետք է օգտվել». Հայկ Մամիջանյան
Բաքվի բանտում հայ ռազմագերիներին հանդիպելու հնարավորության կա, որից պետք է օգտվել։ Այս մասին Ազգային ժողովում ճեպազրույցի ժամանակ հայտարարել է «Պատիվ ունեմ» խմբակցության ղեկավար Հայկ Մամիջանյանը։
Նա ասել է, որ Եվրանեսթ խորհրդարանական վեհաժողովի հաջորդ նիստը տեղի է ունենալու Բաքվում` աշնանը։
«Բաքու մեկնելու հավանականության պարագայում ես կանեմ ամեն ինչ, որպեսզի իմ մեկ տարի առաջ ուղարկած նամակը Ադրբեջանի Միլի մեջլիսի խոսնակին` պահանջով ապահովել հանդիպում Բաքվի բանտում պահվող հայ ռազմագերիների հետ, իրականություն դառնա։ Սա ևս մեկ պատուհան է մեր տղաներին Բաքվի բանտում այցելելու և իրենց որպիսությանը ծանոթանալու համար»,–ասաց խմբակցության ղեկավարը:
Հավելենք նաև, որ «Պատիվ ունեմ»–ի պատգամավոր Հայկ Մամիջանյանը դեռև 2022 թվականի հուլիսին հայ գերիների հարցով դիմել էր Ադրբեջանի Միլի մեջլիսի խոսնակին` Ադրբեջանում անազատության մեջ պահվող հայ ռազմագերիներին տեսակցելու, իրենց առողջական վիճակին ու պահման պայմաններին ծանոթանալու նպատակով այցելություն կազմակերպելու պահանջով։
