ՏԵՍԱՆՅՈՒԹ. «Շարունակում եմ պնդել, որ ինձ համար առաջնայինը ՀՀ-ի պետական շահերի սպասարկումն է». Գուրգեն Արսենյան

Ուզում եմ հասկանալ, թե Արցախի ԱԺ խմբակցությունները իմ որ հայտարարությանն են արձագանքել, իրենք չեն նշել, երբ կճշտեն, այդ ժամանակ էլ ես կարձագանքեմ: Ազգային ժողովում ՝ լրագրողների հետ զրույցում ասաց Արսենյանը, նշելով՝ ես Հայաստանի ԱԺ պատգամավոր եմ, ընտրվել եմ մի քաղաքական թիմի կազմում, որի առաջնային խնդիրը Հայաստանի պետական շահերի սպասարկումն է:

Արցախի ԱԺ բոլոր խմբակցությունները երեկ հանդես էին եկել համատեղ հայտարարությամբ՝ Գուրգեն Արսենյանի հայտարարությունները համարելով վտանգավոր և կոչ էին արել հարցը քննարկել էթիկայի հանձնաժողովում: Խոսքն այն հայտարարության մասին է, որտեղ Արսենյանն ասում էր, որ անընդհատ Ղարաբաղի 120 հազար հայի մասին են խոսում, Հայաստանում էլ  3 մլն հայ կա։

Հարցին, թե պատրա՞ստ է կրկնել իր հայտարարությունը, ըստ որի պետք չէ երեք միլիոն հայերի վտանգի ենթարկել Արցախի 120 հազար բնակիչների համար, Արսենյանը պատասխանեց. 

«Հայաստանը 3 մլն բնակիչ ունի, շարունակում եմ պնդել, որ ինձ համար առաջնայինը Հայաստանի պետական շահերի սպասարկումն է: Արցախի 120 հազար ժողովուրդը, որ շրջափակման մեջ է, մտնում է Հայաստանի պետական շահերի սպասարկման կոմպլեքսի մեջ: Մենք ունենք հնարավորություն ճշտելու, թե որ արտահայտությունը ինչին է ուղղված: Այն լրատվական, քարոզչական աղմուկը, որ կա Հայաստանում եւ Արցախում, եւ որն ուղղված է ՀՀ իշխանությունների դեմ, ինչ-որ պահի կքչանա թեժությունը: ՀՀ իշխանությունների վրա տեղի է ունենում ինչ-որ տարօրինակ տեղեկատվական հարձակում»:Բացի այդ, Արսնեյանը հավելեց, որ Հայաստանը ՀՀ քաղաքացիների պետությունն է, որոնք ապրում են Հայաստանում, հարկեր են վճարում Հայաստանում, ծառայում են ՀՀ բանակում. «Ո՞վ ասաց, որ Արցախի ժողովրդի իրավունքների պաշտպանությունը չի մտնում Հայաստանի պետական շահերի սպասարկման մեջ: Ընկալումների խնդիր է»,-նշել է Արսենյանը:

Մանրամասները` տեսանյութում: