«Մենք ամբողջ ուժով աջակցել ենք Ադրբեջանին իր իրավացի գործում և այսուհետ ևս շարունակելու ենք աջակցել». Աքար
Թուրքիայի պաշտպանության նախարար Հուլուսի Աքարը Կարսում ընթացող «Ձմեռ-2023» զորավարժության բարձր մակարդակի դիտարկման օրվա իր ելույթում վերահաստատել է Անկարայի աջակցությունը Բաքվին:
«Ադրբեջանի հետ մեր համագործակցությունը շարունակվում է։ Ինչպես գիտեք, մինչ օրս մենք ամբողջ ուժով աջակցել ենք Ադրբեջանին իր իրավացի գործում և այսուհետ ևս շարունակելու ենք աջակցել»,- ասել է Աքարը։
Աքարն աջակցություն է հայտնել «Ադրբեջանի և Հայաստանի միջև մնայուն խաղաղության ձևավորման և կայունության ապահովման ջանքերին», կարևորել Հայաստան-Թուրքիա հարաբերությունների կարգավորումը: Աքարն անդրադարձել է նաև «Զանգեզուրի միջանցքի» բացմանը և նշել, թե դա տնտեսական, սոցիալական առումով լուրջ օգուտներ կապահովի Ադրբեջանի և ամբողջ տարածաշրջանի համար:
