Հայաստանում քաղաքացիական առաքելության տեղակայումը պետք է ապահովվի պատշաճ կերպով՝ հաշվի առնելով «ադրբեջանական շահերը». Ադրբեջանի ԱԳՆ
Հայաստանում ԵՄ քաղաքացիական առաքելության ստեղծման վերաբերյալ Եվրամիության խորհրդի որոշումը Ադրբեջանն ի գիտություն է ընդունում, նշվում է երկրի արտաքին գործերի նախարարության՝ այսօր տարածած հաղորդագրության մեջ։
«Մենք շարունակում ենք հաստատակամ դիրքորոշում ունենալ, որ նման գործողությունները, ներառյալ (հայ-ադրբեջանական) սահմանի սահմանազատման գործընթացը, որը պետք է իրականացվի բացառապես երկկողմանի հիմունքներով, չպետք է վնասի Ադրբեջանի և Հայաստանի միջև հարաբերությունների կարգավորման գործընթացին»,-հայտնել են նախարարությունից։
Ադրբեջանի ԱԳՆ-ն հավելել է, որ ԵՄ ներկայացուցիչների հետ Ադրբեջանի կողմից անցկացված մի շարք խորհրդակցությունների ընթացքում նշվել է, որ ԵՄ առաքելության ներկայությունը Հայաստանում չպետք է պատրվակ դառնա Հայաստանի կողմից ստանձնած պարտավորությունները կատարելուց հրաժարվելու համար։ Երկխոսության գոյություն ունեցող մեխանիզմների դեմ ԵՄ առաքելության ներկայությանը չարաշահումը վտանգավոր է և դրանից պետք է խուսափել:
Հիշեցնենք, որ նախօրեին ԵՄ ԱԳ նախարարները հավանություն են տվել Հայաստանում քաղաքացիական առաքելության ստեղծմանը` Կովկասում կարգավորմանը նպաստելու համար: Այս մասին ասվում է ԵՄ խորհրդի տարածած հայտարարության մեջ։
Առաքելության մանդատը նախատեսված է երկու տարով, նրա ղեկավարը կնշանակվի առաջիկայում:
Թեև ադրբեջանական կողմը նշում է, որ առաքելության տեղակայումը Հայաստանում պետք է ապահովվի պատշաճ կերպով՝ հաշվի առնելով ադրբեջանական շահերը, միևնույն է, երկիրը բազմիցս ապացուցել է, որ որևէ առաքելության տեղակայում, խաղաղապահների ներկայություն իրեն չի խանգարում իրակացնել իր հակահայկական քաղաքականությունը:
