Եվրամիությունը լիովին ազատվել է Ռուսաստանից էներգետիկ կախվածությունից․ Բորել

Եվրամիությունը կարողացավ լիովին ազատվել Ռուսաստանից էներգետիկ կախվածությունից։ Այս մասին Diario թերթին տված հարցազրույցում հայտարարել է ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը։ 

Նա նշել է, որ էներգակիրների գները վերադարձել են իրենց մակարդակին մինչև Ուկրաինա Ռուսաստանի ներխուժումը։ 

«Մի քանի ամսում մենք վերացրեցինք էներգետիկ կախվածությունը Ռուսաստանի Դաշնությունից, որը մենք ունեինք տարիներ շարունակ»,- ասել է եվրոպական դիվանագիտության ղեկավարը։ 

2023 թվականի սկզբին ԵՄ-ում գազի գները սկսեցին նվազել տաք ձմռան, գազապահեստարանների բարձր լցվածության և հողմակայաններից էլեկտրաէներգիայի արտադրության ավելացման պատճառով։ Հունվարի 17-ին գազի գինը 2021 թվականի օգոստոսից ի վեր առաջին անգամ  հազար խորանարդ մետրի դիմաց 600 դոլարից իջել է: Ուրբաթ օրը՝ հունվարի 20-ի աճուրդում, էներգիակրի արժեքն աճել է 12%-ով՝ հասնելով հազար խորանարդ մետրի դիմաց 760 դոլարի։