Հայաստանի արտաքին առևտուրը փոխվում է․ ՌԴ-ի հետ շրջանառությունը նվազել է, ԵՄ արտահանումն աճել է հումքի հաշվին

2026 թվականի առաջին կիսամյակում Հայաստանի արտաքին առևտրի հիմնական ուղղություններում փոփոխություններ են գրանցվել։ ՀՀ վիճակագրական կոմիտեի տվյալների համաձայն՝ Ռուսաստանի հետ ապրանքաշրջանառությունը նախորդ տարվա նույն ժամանակահատվածի համեմատ նվազել է 20,9 տոկոսով, այս մասին փոխանցում է Սպուտնիկ Արմենիան:

Ռուսաստանի հետ առևտրի ընդհանուր ծավալը մոտ 3,33 մլրդ դոլարից նվազել է մինչև 2,63 մլրդ դոլար։ Հայաստանից արտահանումը փոքր-ինչ կրճատվել է՝ 1,28 մլրդ դոլարից հասնելով 1,23 մլրդ դոլարի, իսկ ներմուծումը նվազել է ավելի զգալի՝ 2,04 մլրդ դոլարից մինչև 1,4 մլրդ դոլար։

Անկման հիմնական պատճառներից մեկը վերարտահանման ծավալների նվազումն է։ Միաժամանակ նվազել է նաև Հայաստանից Ռուսաստան պտուղ-բանջարեղենի մատակարարումը։ Եթե նախորդ շրջանում արտահանվել էր մոտ 85 մլն դոլարի գյուղմթերք, ապա այժմ ցուցանիշը նվազել է մինչև 56 մլն դոլար։

Եվրամիության երկրների հետ առևտրում աճ է գրանցվել, սակայն հիմնականում՝ հումքի արտահանման հաշվին։ Մասնավորապես, Բելգիայի և Բուլղարիայի հետ ապրանքաշրջանառության աճը պայմանավորված է եղել պղնձի խտանյութի մատակարարումներով։

Միաժամանակ ԵՄ շուկա պատրաստի արտադրանքի, թարմ մրգի, բանջարեղենի, գինու և կոնյակի արտահանումը շարունակում է մնալ սահմանափակ։

ԱՄՆ-ի հետ Հայաստանի ապրանքաշրջանառությունը աճել է՝ 180 մլն դոլարից հասնելով 256,1 մլն դոլարի։ Սակայն դեպի ԱՄՆ արտահանումը դեռևս չի հասել նախկին մակարդակին՝ ալյումինե փայլաթիթեղի նկատմամբ սահմանված հակադեմպինգային միջոցներից հետո։

Աճ է գրանցվել նաև Չինաստանի և Իրանի հետ առևտրում։ Չինաստանի հետ ապրանքաշրջանառությունն աճել է մինչև 1,47 մլրդ դոլար, հիմնականում՝ թանկարժեք մետաղների, ինչպես նաև պղնձի և մոլիբդենի խտանյութերի մատակարարումների հաշվին։