ՏԵՍԱՆՅՈՒԹ․ Հյուսիսային պողոտայում կոտրել են «Մանկական Եվրատեսիլ-2022»-ի սիմվոլը՝ հոլը

Մինչ բոլորը քննարկում են Երևանի զարդարանքի, «Մանկական Եվրատեսիլ - 2022» երգի մրցույթի կազմակերպման հարցերը, հայտնում իրարամերժ կարծիքներ՝ Auroranews-ի ձեռքի տակ հայտնվել է ուշագրավ տեսանյութ, որում երևում է, որ Երևանում անցկացվող մրցույթի սիմվոլը՝ հոլը, կոտրված է։ 

Ավելի վաղ հայտնել էինք, որ երեկ Երևանում` Հանրապետության հրապարակում, վառվեցին երկրի գլխավոր տոնածառի լույսերը։ Այսպիսով ազդարարվեց նաև «Մանկական Եվրատեսիլ– 2022» երգի միջազգային մրցույթի մեկնարկը։ 

Այս տարի «Մանկական Եվրատեսիլ»-ն իր 20-րդ պտույտն է կատարում. մրցույթի խորհրդանիշն ընտրվել է գունազարդ հոլը։ Մրցույթի այս տարվա խորհրդանիշ հոլի տեսակը հատուկ է հայկական մշակույթին և զարդարված է ազգային նախշերով։ Այդ նախշերը Հայաստանում կարելի է տեսնել պատմական-ճարտարապետական հուշարձանների, գորգերի և հագուստի վրա։ 

Նշենք, որ մրցույթի եզրափակիչը տեղի կունենա դեկտեմբերի 11-ին, Կարեն Դեմիրճյանի անվան մարզահամերգային համալիրում:

Այս ամենին զուգահեռ համացանցում ակտիվ էին քննարկումներն այն մասին, որ երեկվա միջոցառումները կազմակերպված էին շատ գեղեցիկ, շռնդալից և ճաշակով։ Չնայած դրան, կային նաև քննադատություններ, որ չարժեր 650․ 000 ԱՄՆ դոլար ծախսել ամանորյա զարդարանքների համար՝ այն էլ պատերազմ ապրած երկրում։