Ռուսաստանը կընդլայնի լոգիստիկ միջանցքները. Միշուստին
Ռուսաստանը գործընկերների հետ համատեղ մտադիր է ընդլայնել լոգիստիկ միջանցքները, առաջնահերթ երեք ուղղություններն արդեն որոշվել են։ Այս մասին հայտարարել է Ռուսաստանի վարչապետ Միխայիլ Միշուստինը «Արտադրված է Ռուսաստանում» համաժողովի ժամանակ։
«Հուսալի գործընկերների հետ համատեղ աշխատում ենք տրանսպորտային լոգիստիկ միջանցքների ընդլայնման վրա։ Կառավարությունը ենթակառուցվածքների զարգացման երեք առանցքային ուղղություն է որոշել` Ազով–սևծովյան, Արևելյան և Կասպից։ Դրանք հիմք են հանդիսանում առևտրատնտեսական կապերի ընդլայնման համար», – ասել է ՌԴ կառավարության ղեկավարը։
Նա հավելել է, որ բիզնեսի և իշխանության տարածաշրջանային մարմինների հետ միասին այժմ փորձարկում են որոշումները, որոնք կօգնեն մի քանի անգամ արագացնել բեռների մշակումը։
Միշուստինի խոսքով` արևելյան ուղղությամբ արագ տեմպերով աճում են ոչ հումքային ապրանքների ուղարկումը Ասիա–խաղաղօվկիանոսյան տարածաշրջան։ Միևնույն ժամանակ Իրան, Մերձավոր Արևելք և Հարավային Ասիա մատակարարումներ իրականացնելու համար աշխատանքներ են տարվում «Հյուսիս–հարավ» միջազգային տրանսպորտային միջանցքի արևմտյան երթուղին զարգացնելու ուղղությամբ, որտեղ Կասպից ծովի շրջանի գործընկերների հետ համատեղ մինչև 2030 թվականը նախատեսվում է բեռնաշրջանառությունը հասցնել տարեկան մինչև 15 մլն տոննայի։
Միշուստինը նշել է նաև, որ սահմանափակումներից առաջ արտերկիր ռուսական ապրանքների տեղափոխման բոլոր ծառայությունները իրականացնում էին միջազգային խոշոր 8 ընկերություններ, որոնք հեռացել են շուկայից։
