Իրանը դեմ է օտարերկրացիների ներկայությանը և Ադրբեջանում, և Հայաստանում․ Աբդոլլահիան

 Իրանը դեմ է այս տարածաշրջանում օտարերկրացիների ներկայությանը ե՛ւ Ադրբեջանում, ե՛ւ Հայաստանում։ Այս մասին Երեւան ժամանելուց հետո հայտարարել է Իրանի արտգործնախարար Հոսեյն Ամիր Աբդոլլահիանը, գրում է Mehr-ը։

Վերջինս քաղաքական եւ խորհրդարանական պատվիրակության գլխավորությամբ ժամանել է Երեւան։

«Մենք ակնկալում ենք երկարաժամկետ համագործակցություն երկու երկրների միջեւ, եւ այս այցի ընթացքում փաստաթուղթ կկազմվի։ Մենք դեմ ենք այս տարածաշրջանում օտարերկրացիների ներկայությանը թե՛ Ադրբեջանում, թե՛ Հայաստանում»,-հավելել է նա։ 

Նա գոհունակություն է հայտնել Իրանի եւ Հայաստանի միջեւ ապրանքաշրջանառության ծավալների առնչությամբ, որն անցյալ տարվա համեմատ աճել է ավելի քան 43 տոկոսով։  

Ամիր Աբդոլլահիանը Երեւանում է իր հայ գործընկեր Արարատ Միրզոյանի հրավերով։ Նա հանդիպումներ կունենա Հայաստանի մի շարք պաշտոնյաների, այդ թվում՝ վարչապետ Նիկոլ Փաշինյանի հետ։ Վաղը Իրանի եւ Հայաստանի արտգործնախարարները կմասնակցեն Կապանում Իրանի գլխավոր հյուպատոսության բացման արարողությանը։