ՀԱՊԿ-ում պետք է մի քիչ լուրջ մտածեն իրենց մասին Ադրբեջանի ձևակերպումների հարցում. Արմեն Գրիգորյան

Խաղաղության պայմանագիրը մի գործընթաց է, Լեռնային Ղարաբաղի հիմնախնդրի կարգավորման միջազգային մեխանիզմի ստեղծումը մեկ այլ գործընթաց է: Այս մասին Հանրայինի եթերում ասել է ՀՀ Անվտանգության խորհրդի քարտուղար Արմեն Գրիգորյանը:

«Եթե որեւիցե հավելյալ մոտեցումների փոփոխություն չլինի, այս տրամաբանությամբ պետք է առաջ շարժվենք»,- ասել է նա:
 

Անդրադառնալով ադրբեջանական կողմի ուղարկած ընդլայնված առաջարկներին խաղաղության պայմանագրին, Գրիգորյանն ասել է, որ այդ առաջարկները ՀՀ արտգործնախարարը ստացել է Ժնեւում: Իր խոսքով՝ ադրբեջանական կողմի ընդլայնված առաջարկները նախկինում ներկայացված 5 սկզբունքների տրամաբանության մեջ են:

Անդրադառնալով ՌԴ ԱԳՆ  պաշտոնական ներկայացուցիչ  Զախարովայի այն հայտարարությանը, որ ՌԴ առաջարկն ավելի  հավասարակշռված է կողմերի համար, ԱԽ քարտուղարն ասաց, որ դեռ պետք է հասկանանք` արդյոք Բաքուն ընդունում է այդ առաջարկները, որ կարողանան առաջ շարժվել:

«Ռուսաստանը տարածաշրջանում ներկա է եւ ներկա լինելու իրենց նպատակը կայունություն եւ անվտանգություն  ապահովելն է»,- ասել է Գրիգորյանը,- «Բոլոր այն երկրները, որոնք կփորձեն աջակցել այս գործընթացին, կփորձենք աշխատել իրենց հետ»:

Հարցին, թե ինչ նորություն կա ՀԱՊԿ-ից, Գրիգորյանն ասել է, որ  ՀԱՊԿ-ից որեւէ նորություն չունեն:
 

«Որեւէ նորություն չունենք, որ ՀԱՊԿ-ը պատրաստում է իրական քայլեր Ադրբեջանին Հայաստանի սուվերեն տարածքից դուրս անելու համար: Կարծում եմ` ՀԱՊԿ-ում արդեն տեղյակ են, թե Ադրբեջանը ինչպիսի  ձեւակերպումներ է տալիս եվրոապական մայրաքաղաքներում ՀԱՊԿ-ի մասին, ես կարծում եմ` դրա մասին ՀԱՊԿ-ում պետք է մի քիչ լուրջ մտածեն»,- ասել է նա` հավելելով, որ դեռ սպասում են ՀԱՊԿ-ի արձագանքին: