«Վերջերս ճակնդեղի նմանվող մի սրիկա ելույթ էր ունենում». Լուկաշենկո
Բելառուսում զորահավաք հայտարարելու կարիք չկա։ Այս մասին հայտարարությամբ է հանդես եկել Բելառուսի նախագահ Ալեքսանդր Լուկաշենկոն: Տեղեկատվությունը փոխանցում է ՌԻԱ Նովոստին:
Վերջինս Պաշտպանության նախարարությունում ռազմական անվտանգության վերաբերյալ խորհրդակցություն է անցկացրել և նշել.
«Սկսում են կառչել տարբեր տեսակի պատրվակներից. Ռուսաստանը զորահավաք է հայտարարել, ուրեմն Բելառուսում վաղը զորահավաք կհայտարարեն։ Մեկ անգամ էլ եմ ընդգծում. մենք զորահավաք հայտարարելու կարիք չունենք։ Բարեբախտաբար, Բելառուսի տարածքում պատերազմ չկա»,- ընդգծել է Լուկաշենկոն։
«Ես արդեն մի քանի անգամ ասել եմ, էլի կընդգծեմ. վերջերս ճակնդեղի նմանվող մի սրիկա ելույթ էր ունենում՝ «Լուկաշենկոն պատրաստվում է պատերազմի» տիտրերով։ Լրիվ ճիշտ է։ Որքան որ նախագահ եմ, այնքան պատրաստվում եմ պատերազմի։ Եվ ես չէ, որ հորինել եմ. «Եթե խաղաղություն ես ուզում, պատրաստվիր պատերազմի»,- ասել է Բելառուսի նախագահը։
