Զելենսկի․ Ուկրաինան պատրաստ է գնել Patriot համակարգերի համար անհրաժեշտ հրթիռները

Ուկրաինային անհրաժեշտ են լրացուցիչ հրթիռներ Patriot հակաօդային պաշտպանության համակարգերի համար, որոնք կարող են տրամադրել գործընկերները, և Կիևը պատրաստ է դրանք գնել։ Այս մասին հայտարարել է Ուկրաինայի նախագահ Վլադիմիր Զելենսկին։

«Patriot-ի համար հրթիռներ են անհրաժեշտ, և դա կարող են ապահովել միայն մեր գործընկերները։ Բոլոր մակարդակներում նրանց ներկայացնում ենք թե՛ մեր կարիքը, թե՛ այն փաստը, որ գիտենք՝ գործընկերները կարող են բավարարել այդ կարիքը։ Խոսքը նվերների մասին չէ, Ուկրաինան պատրաստ է զենք գնել»,- ասել է Զելենսկին հինգշաբթի երեկոյան իր ուղերձում։

Նրա խոսքով՝ դրա համար անհրաժեշտ են գործընկերների, առաջին հերթին՝ Միացյալ Նահանգների համապատասխան քաղաքական որոշումները։

Զելենսկին նաև հայտնել է, որ ռուսական հարվածի հետևանքով զոհվել է 16 մարդ, ևս շուրջ 50-ը վիրավորվել է։ Վնասվել է ավելի քան 200 օբյեկտ, այդ թվում՝ 86 բնակելի տուն, մանկական հիվանդանոց և սոցիալական ենթակառուցվածքների օբյեկտներ։

«Մենք անպայման կպատասխանենք ռուսական այս հարվածին, ինչպես պատասխանում ենք յուրաքանչյուր նման հարվածի։ Պատասխանը կլինի արդար և հեռահար»,- հայտարարել է Ուկրաինայի նախագահը։