ՀԱՊԿ գլխավոր քարտուղարի գլխավորած պատվիրակությունը Հայաստանում է

ՀԱՊԿ գլխավոր քարտուղար Ստանիսլավ Զասի գլխավորած պատվիրակությունը ժամանել է Հայաստան, տեղեկացնում են Կազմակերպության քարտուղարությունից։

«ՀԱՊԿ առաքելությունը՝ կազմակերպության գլխավոր քարտուղար Ստանիսլավ Զասի գլխավորությամբ, ժամանել է Հայաստան՝ ուսումնասիրելու իրավիճակը, այդ թվում՝ Հայաստանի և Ադրբեջանի սահմանին և առաջարկներ նախապատրաստելու համատեղ լրացուցիչ միջոցառումների համար»,- նշել է ՀԱՊԿ մամուլի քարտուղար Վլադիմիր Զայնետդինովը։

 «Առաքելությանը վերապահված են ներկա իրավիճակը գնահատելու, ՀԱՊԿ անդամ երկրների ղեկավարներին տարածաշրջանում տիրող իրավիճակի վերաբերյալ մանրամասն զեկույց ներկայացնելու, Հայաստանի և Ադրբեջանի սահմանի որոշ հատվածներում լարվածության թուլացման համար առաջարկներ մշակելու խնդիրները։ Առաքելության աշխատանքի ընթացքում նախատեսվում են սահմանամերձ շրջաններում առկա իրավիճակի ուսումնասիրություն և մոնիտորինգ, ինչպես նաև հանդիպումներ Հայաստանի բարձրագույն քաղաքական և ռազմական ղեկավարության հետ»,- հայտնել է Զայնետդիոնվը։

Առաքելության կազմում ընդգրկված են ՀԱՊԿ անդամ երկրների ներկայացուցիչներ, որոնք Կազմակերպության աշխատանքային մարմինների աշխատակիցներ են, հստակեցրել է Զայնետդինովը։