Ջերմուկի ղեկավարը՝ քաղաքում կատարվողի մասին
Վայոց ձորի Ջերմուկ քաղաքի վրա այս պահին չեն կրակում։ Այս մասին NEWS.am–ի հետ զրույցում ասել է քաղաքապետ Վահագն Արսենյանը՝ նշելով, որ հակառակորդը քաղաքի վրա կրակել է երեկ՝ մինչեւ առավոտյան 9–ը։
«Ճանապարհի կողքն են կրակում, բայց ոչ ճանապարհի համար։ Սուտ է տեղեկությունը, որ քաղաքացիական ենթակառուցվածքների վրա են կրակում, նման բան չկա։ Հարակից անտառներում բռնկված հրդեհն էլ մարվել է, ծխացող օջախ կա»,– ասել է քաղաքապետը։
Ավելի վաղ ՊՆ խոսնակ Արամ Թորոսյանը մեզ հետ զրույցում ասել էր, որ ժամը 10։30–ի դրությամբ, ադրբեջանական ստորաբաժանումները Ջերմուկի ուղղությամբ կիրառել են ականանետեր, հրետակոծել են քաղաքացիական ենթակառուցվածքները։
Հիշեցնենք, որ Պաշտպանության նախարարությունն ավելի վաղ հաղորդել էր, որ չնայած նախորդ օրվա սանձազերծած ագրեսիայի մնացած ուղղություններով, էական միջադեպեր չեն արձանագրվել, սեպտեմբերի 14–ին ժամը 08։00-ից սկսած հակառակորդը, կիրառելով հրետանային միջոցներ, ականետեր եւ խոշոր տրամաչափի հրաձգային զինատեսակներ, կրկին սկսել է նախահարձակ գործողություններ, մասնավորապես՝ Ջերմուկի եւ Վերին Շորժայի ուղղություններով։
