1 զոհ. 6 վիրավոր. ՔՊ-ական պատգամավորը հերքում է Ապարանում կրակոցների հետ կապը

«Քաղաքացիական պայմանագիր» խմբակցության պատգամավոր Մաթևոս Ասատրյանը իր ֆեյսբուքյան էջում հերքել է լուրերը, թե ինքը կամ իր ընտանիքի անդամները մասնակցել են ժամեր առաջ տեղի ունեցած ողբերգական դեպքին։

«Հարգելի քաղաքացիներ, հայտնում եմ, որ արդեն մի քանի ժամ մամուլում և որոշ անբարոյական քաղաքական գործիչների կողմից տարածվող լուրերը, թե ես կամ իմ ընտանիք անդամները մասնակցել ենք ժամեր առաջ տեղի ունեցած ողբերգական դեպքին, բացարձակ սուտ են և աղերս չունեն իրականության հետ։

Ակնհայտ է, որ մարդասպանությունը նվիրական հավատամք դարձրածները այս սուտ լուրերով փորձում են հավասարության նշան դնել մեր և իրենց միջև։ Չի՛ հաջողվելու, սրիկաներ։

Ցավակցում եմ մահացածի հարազատին, ապաքինում եմ մաղթում վիրավորներին, վստահ եմ՝ շուտով գործն ամբողջությամբ կբացահայտվի։ Խոհեմություն բոլորիս»,–գրել է նա։

Ավելի վաղ հայտնի էր դարձել, որ վիճաբանություն է տեղի ունեցել ՔՊ պատգամավոր Մաթևոս Ասատրյանի հարազատների և ՔՊ Արագածոտնի փոխմարզպետ Էդգար Փարվանյանի հորեղբոր որդիների միջև։ Ըստ լրատվամիջոցների՝ վիճաբանության ժամանակ կրակոցներ էին հնչել, ինչի հետևանքով կա զոհ, վիրավորվել է 6 մարդ: