«Ոչ թե հանդիպում են ուզում, այլ՝ բեմականացված ու գռեհիկ շոուներ». Ավանեսյանը` ընդդիմադիրների մասին

«Ես կարծում եմ՝ Ազգային ժողովում Էթիկայի հանձնաժողովը, որը որ կստեղծվի, մանրամասն կքննի այս վարքագիծը, պատգամավորին ոչ հարիր գործելաոճը ու խստորեն արձագանք կլինի դրան», - կառավարությունում լրագրողների հետ զրույցում ասաց Ավանեսյանը։

Ավանեսյանի խոսքով՝ ընդդիմադիրները ոչ թե հանդիպում են ուզում, այլ՝ «բեմականացված ու գռեհիկ շոուներ»։

«Այո՛, ոստիկանական ուժերն ու մեր բոլոր իրավապահները պետք է գործեն խստիվ, օրենքի շրջանակներում», - նշեց նախարարը։

Ավանեսյանն ասաց, թե ժողովրդավարություն չի նշանակում անօրինական թողտվություն։ Ժողովրդավարություն, նրա խոսքով, նշանակում է պատշաճ վարքագիծ, իսկ երբ դա չկա, այո՛, պետք է կիրառվի վարչարարություն։

Հիշեցնենք՝ ԱԺ «Հայաստան» խմբակցության պատգամավորներ Ասպրամ Կրպեյանը, Քրիստինե Վարդանյանը, «Պատիվ ունեմ» խմբակցության պատգամավոր Աննա Մկրտչյանը երեկ գնացել են Առողջապահության նախարարություն, մուտք գործել սենյակ, որտեղ նախարարը խորհրդակցության է եղել։ Ընդդիմադիր պատգամավորները նախարարի դիմաց նետել են 44-օրյա պատերազմում զոհված տղաների լուսանկարները, որտեղ նրանց մարմինները պարկերով գետնին էին նետված։