Իմ դեմ էր արշավ, Թաթոյանի հետ արվածը նույնիսկ արշավիկ չէր. Կարեն Անդրեասյան
Նախկինների բոստանը չեմ ուզում քար գցել, բայց ժամանակին, երբ որ մի անձի պետք էր նստեցնել, բոլոր մարմինները շարքով կանգնած իրար ձեռք ձեռքի տված անում էին նմանատիպ գործողություններ։ Այս մասին Ազգային ժողովում՝ լրագրողների հետ զրույցում ասել է ՀՀ արդարադատության նախարար Կարեն Անդրեասյանը` անդրադառնալով Հակակոռուպցիոն կոմիտեի ղեկավար Սասուն Խաչատրյանի և Գլխավեր դատախազ Արթուր Դավթյանի միջև հարաբերություններին։
Դիտարկմանը, երբ նախկին ՄԻՊ Արման Թաթոյանը հակասում էր իշխանության տեսակետին, նրան կառավարության նիստերին չէին հրավիրում, եւ այսպես ասած՝ արշավ էին սկսել նրա դեմ, այդ գործընթացն ինչպե՞ս կբացատրի՝ նախարարն արձագանքեց.
«Այ իմ դեմ իսկապես արշավ սկսվել էր, այն որ ասում են՝ արշավը այսպիսին է լինում: Այն, ինչ արվել է պարոն Թաթոյանի հետ, նույնիսկ արշավիկ չէր, ջերմ հարաբերություններ ու աջակցություն է եղել: Կառավարության նիստերին ես ինքս չեմ գնացել երկար ժամանակ, որովհետեւ համարել եմ, որ ՄԻՊ-ի ներկայությունը այդ նիստերին ոչ նպատակահարմար է: Հիմա, իմ իմանալով, պարոն Թաթոյանը ինքն է բաց թողել որոշ ժամանակ նիստեր, որից հետո իր այդ տեղը կարծեմ հանել էր: Սա արշավ չէ, եթե կառավարության նիստին մասնակցությունը լիներ արշավ, իմ պաշտոնավարման ժամկետը մինչեւ վերջ կավարտվեր»:
