ՏԵՍԱՆՅՈՒԹ. ՆԱՏՕ-ին միանալու համար Ֆինլանդիան և Շվեդիան պաշտոնապես հայտ են ներկայացրել
ՆԱՏՕ-ում Ֆինլանդիայի և Շվեդիայի դեսպանները դաշինքի գլխավոր քարտուղար Ենս Ստոլտենբերգին պաշտոնապես ներկայացրել են իրենց երկրների ՆԱՏՕ-ին միանալու հայտերը։ Հանձնման առցանց արարողությունը հեռարձակել է դաշինքի մամուլի ծառայությունը։
Ստոլտենբերգն ասել է, որ ՆԱՏՕ-ն ողջունում է դաշինքին միանալու Շվեդիայի և Ֆինլանդիայի հայտերը, մտադիր է ապահովել, որ դրա համար անհրաժեշտ բոլոր հարցերը հնարավորինս շուտ լուծվեն: Նա ընդգծել է, որ այժմ ՆԱՏՕ-ն կզբաղվի իր անվտանգության համակարգը Բալթյան երկրներում ադապտացնելու հարցով, գրում է ՏԱՍՍ-ը:
«Ես ջերմորեն ողջունում եմ Շվեդիայի և Ֆինլանդիայի՝ ՆԱՏՕ-ին միանալու խնդրանքը։ Այն հայտերը, որոնք դուք այսօր ներկայացրել եք, պատմական քայլ է։ Դաշինքը այժմ կքննարկի ՆԱՏՕ-ի ճանապարհին հաջորդող քայլերը։ Պետք է հաշվի առնել բոլոր երկրների անվտանգության շահերը, և մենք վճռական ենք լուծել բոլոր հարցերը և հասնել ընդունելության գործընթացի արագ ավարտին»,- ասել է նա։
Հիշեցնենք, որ ՌԴ արտաքին գործերի փոխնախարար Սերգեյ Ռյաբկովն օրերս հայտարարել էր, որ Ռուսաստանը պարզապես չի հաշտվի ՆԱՏՕ-ին Ֆինլանդիայի և Շվեդիայի անդամակցության հետ՝ Արևմուտքին կոչ անելով այս առիթով պատրանքներ չփայփայել։
«Ռազմական լարվածության ընդհանուր մակարդակը բարձրանում է, իսկ կանխատեսելիությունն այս ոլորտում՝ նվազում։ Ափսոս, որ առողջ բանականությունը զոհաբերվում է ինչ-որ ֆանտոմային պատկերացումների այն մասին, թե ինչ պետք է անել ստեղծվող իրավիճակում»,- ընդգծել է դիվանագետը։
«Թե ինչպես Ռուսաստանը կսկսի ապահովել իր անվտանգությունը ՆԱՏՕ-ի ընդհանուր դասավորության փոփոխությունից հետո՝ առանձին հարց է։ Դրա լուծումը կախված կլինի այն բանից, թե կոնկրետ ինչ հետևանքների կհանգեցնի Հյուսիսատլանտյան դաշինքին երկու երկրների միանալը»,- հավելել է Ռյաբկովը։
