ՏԵՍԱՆՅՈՒԹ․ «Արցախը իր չէ, առարկա չէ, որ հանձնես կամ չհանձնես»․ Փաշինյան
Նիկոլ Փաշինյանը կառավարության այսօրվա նիստն սկսեց մոսկովյան այցը ամփոփելով ու Արցախյան խնդրի կարգավորմանն առնչվող բանակցությունների վերաբերյալ մանրամասներ ներկայացնելով:
Այս կոնտեքստում նա հայտարարեց, որ ամեն նման հանդիպումից հետո հանդիպել է Հայաստանի իշխանական և քաղաքական տարբեր բարձրաստիճան շրջանակների, այդ թվում` Արցախի նախագահի հետ իր բանակցածի մասին տեղեկացրել նրանց:
Ապա դժգոհեց ընդդիմադիր ուժերից, որ նա ցանկացել է նաեւ ընդդիմության հետ հանդիպել և նրանց տեղեկացնել` ինչ պատկեր ունենք բանակցային գործընթացում և ինչ է ինքը բանակցել տարբեր հանդիպումներում, բայց ընդդիմությունը, ըստ նրա, «թերևս հասկանալի պատճառներով» հրաժարվել է իր հետ հանդիպել, որ վաղը այլազան դավադրության տեսությունների մասին լեգենդներ հյուսեն և այդ լեգենդները դնեն իրենց գործունեության հիմքում:
Նա նաև անդրադարձավ իր կողմից Արցախը հանձնելու վերաբերյալ փաստաթուղթ ստորագրելու մասին պարբերաբար տարածվող տեղեկություններին` հայտարարելով, որ այս պահին չկա Արցախյան խնդրի կարգավորման որևէ նախագիծ, որը սեղանի վրա լինի կամ շրջանառության մեջ լինի:
«Ինչ վերաբերում է Արցախը հանձնելուն, հազար անգամ ներողություն խնդրելով` ստիպված եմ արձանագրել, որ Արցախը իր չէ, առարկա չէ, որ հանձնես կամ չհանձնես, Արցախը, առաջին հերթին, այնտեղ ապրող մարդն է»,-ասաց Փաշինյանը:
Հետո նկատեց, որ եթե իրենք Արցախը հանձնող լինեին, պատերազմից հետո տասնյակ միլիոնավոր դրամներ չէին ծախսի, ոչ ապահովեն արցախցիների վերադարձը այնտեղ:
