Իրականում Գյումրու որ դպրոցում է տեղի ունեցել Ռուսաստանին պաշտպանող միջոցառումը․ նոր մանրամասներ
Քիչ առաջ հայտնեցինք, որ երեկ Գյումրիում գտնվող դպրոցներից մեկի աշակերտների մասնակցությամբ ակցիա է եղել՝ ի պաշտպանություն Ռուսաստանի։ Auroranews-ի տեղեկություններով՝ խոսքը Գյումրու N 19 ռուսական դպրոցի մասին է, որը գտնվում է 8-րդ զինվորական թաղամասում և որտեղ հիմնականում սովորում են ազգությամբ ռուսները։ Հարկ է նշել, որ դպրոցում սովորում են նաև ազգությամբ հայ երեխաներ՝ դա է պատճառը, որ միջոցառման լուսանկարները մեծ աղմուկ և զայրույթ են առաջացրել հանրության շրջանում։
Թեմային անդրադարձել է նաև «Ասպարեզ» մամուլի ակումբի նախագահ Լևոն Բարսեղյանը գրել է. «Մի քանի հոգի, շատ լավ իմանալով, որ երեկ երեխաներին բակ հանած ու Z շարած դպրոցը ՀՀ ԿԳՄՍ ենթակայության դպրոց չէ, այլ ՌԴ ենթակայության դպրոց է, որտեղ սովորում են հիմնականում ՌԴ քաղաքացիների երեխաներ, այդ թվում՝ էթնիկ հայեր, չեն դադարում մատնացույց անել Գյումրին ու գյումրեցիներին, թե բա էս ինչ խայտառակություն է, ինչու տեր չեք լինում: Ուզում եմ հարցնել՝ ինչ կհրամայեք անել, գնալ մտնել ռուսական բազայի զինավա՞ն, քանդե՞լ էդ դպրոցը, թե՞ պատանդ վերցնել դպրոցի տնօրենին, թե՞ անեծքով բավարարվել... Կրկնում եմ՝ խոսքս նրանց մասին է, որ շատ լավ գիտեն, որ այդ դպրոցը ՀՀ ենթակայության դպրոց չէ, բազայի ենթակառուցվածքներից է, ու գյումրեցիք չեն մեղավոր, որ այստեղ բազա կա ու դպրոց կա ու Պերմյակով կար ու Ռազգիլդյայև կա:
Դուռ դրեք վրեքդ: Իսկ ԿԳՄՍ-ին խորհուրդ կտամ վերջապես հանդես գալ հայտարարությամբ, բացատրել այս ամենը»:
