ԱՄՆ-ն փակում է երկրի օդային տարածքը Ռուսաստանի բոլոր չվերթերի համար
Ամերիկյան իշխանությունները փակում են երկրի օդային տարածքը Ռուսաստանի Դաշնության ինքնաթիռների համար: Այս մասին ասել է ԱՄՆ նախագահ Ջո Բայդենը՝ մարտի 1-ի երեկոյան ԱՄՆ-ի Կոնգրեսի Ներկայացուցիչների պալատի և Սենատի առջև «Երկրի դրության մասին» տարեկան ուղերձի ժամանակ․ փոխանցում է ՏԱՍՍ-ը։
«Ես հայտարարում եմ, որ մենք միանում ենք մեր դաշնակիցներին և փակում ենք ԱՄՆ-ի օդային տարածքը Ռուսաստանի բոլոր չվերթերի համար»,- ասել է Բայդենը։
Արգելքն ուժի մեջ կմտնի մարտի 2-ի վերջին։ Այն վերաբերում է մարդատար և բեռնատար, կանոնավոր և չարտերային չվերթերին, ինչը ենթադրում է ԱՄՆ-ի օդային տարածքի փակում՝ ՌԴ բոլոր առևտրային ավիափոխադրողերի ու այլ քաղաքացիական օդանավերի համար։
Բայդենն ասել է, որ ամերիկյան զորքերը չեն կռվի Ուկրաինայում, այլ կպաշտպանեն ՆԱՏՕ-ի դաշնակիցներին Եվրոպայում։
Boeing-ը դադարեցրել է ռուսական ավիաընկերությունների սպասարկումն ու աջակցությունը։
Կանադան էլ իր հերթին պատժամիջոցներ է սահմանել Դմիտրի Մեդվեդևի, Սերգեյ Սոբյանինի, Ալեքսանդր Բեգլովի և մի շարք այլ բարձրաստիճան ռուսների նկատմամբ։
