Ռուսաստանն ու Ադրբեջանը կխորացնեն ռազմական համագործակցությունը

Արդեն հայտնել էինք, որ Ռուսաստանի նախագահ Վլադիմիր Պուտինն ու Ադրբեջանի նախագահ Իլհամ Ալիևը ստորագրել են Ռուսաստանի և Ադրբեջանի միջև դաշնակցային փոխգործակցության հռչակագիրը: 

Երկու երկրների կողմից ստորագրված հռչակագրում նշվում է, որ Ռուսաստանն ու Ադրբեջանը մտադիր են խորացնել ռազմական համագործակցությունը։ 

Փոխգործակցությունը ՌԴ–ի և Ադրբեջանի ԶՈւ–ների միջև ներառելու է օպերատիվ և մարտական պատրաստության համատեղ միջոցառումների անցկացում, ինչպես նաև երկկողմանի ռազմական համագործակցության այլ ուղղությունների զարգացում։
 

Հռչակագիրը նախատեսում է փոխգործակցություն ժամանակակից սպառազինությամբ և ռազմական տեխնիկայով համալրելու հարցերում, ինչպես նաև տվյալ ոլորտի այլ ուղղություններով։ Ալիևը հայտարարել է, որ Ռուսաստանի և Ադրբեջանի միջև դաշնակցային փոխգործակցության մասին հռչակագիրը ապագայի համար հսկայական հեռանկարներ է բացում։ Նրա խոսքով` այն դրական նշանակություն կունենա Ռուսաստանի և Ադրբեջանի, ինչպես նաև տարածաշրջանային անվտանգության համար։

Իչպես արդեն հաղորդել էինք, այսօր Կրեմլում Պուտինն ու Ալիևը հանդիպում և առանձնազրույց են ունեցել` հռչակագրի ստորագրման և երկու երկրների համար դրա կարևորության մասին: