Ինչու էր ԱՄՆ դեսպանն այցելել ՌԴ ԱԳՆ. Ամերիկան գրավոր պատասխան է ստացել

 ԱՄՆ–ն Ռուսաստանից գրավոր պատասխան է ստացել անվտանգության հարցերով առաջարկների վերաբերյալ։ Պատասխանը փոխանցվել է Մոսկվայում ամերիկյան դիվանագիտական առաքելության ղեկավար Ջոն Սալիվանին։ Տեղեկությունը հայտնում է CBS-ը՝ վկայակոչելով Պետդեպարտամենտի բարձրաստիճան պաշտոնյայի։

«Մենք կարող ենք հաստատել, որ պատասխան ենք ստացել Ռուսաստանի Դաշնությունից, այն այսօր հանձնվել է Մոսկվայում ԱՄՆ դեսպան Ջոն Սալիվանին», - հեռուստաալիքը մեջբերում է ամերիկացի դիվանագետներից մեկի խոսքը, որի անունը չի հայտնում։

Սալիվանն այսօր այցելել էր ՌԴ ԱԳՆ։ Մոտ 15 րոպե այնտեղ մնալուց հետո դիվանագետը լքել էր շենքը՝ առանց լրագրողների հետ զրուցելու։

Փետրվարի 14–ին ՌԴ նախագահ Վլադիմիր Պուտինի հետ հանդիպման ժամանակ Լավրովը հայտնել էր, որ անվտանգության երաշխիքների վերաբերյալ ԱՄՆ-ի ու ՆԱՏՕ-ի պատասխանների արձագանքը Ռուսաստանը ձևակերպել է 10 էջում: Նախարարի խոսքով՝ նախագահը սկզբունքորեն հավանություն է տվել փաստաթղթին, առաջիկայում այն կփոխանցվի ԱՄՆ-ին ու ՆԱՏՕ-ին: Լավրովը հավաստիացրել էր, որ ռուսական կողմը փաստաթուղթը կհրապարակի, երբ այն փոխանցվի արևմտյան մայրաքաղաքներին:

Արևմուտքը Ռուսաստանի Դաշնությանը մեղադրում է Ուկրաինայի շուրջ իրավիճակը սրելու ենթադրյալ ծրագրերի մեջ։ Մոսկվան կտրականապես հերքում է դա և անընդհատ ասում, որ ոչ ոքի չի սպառնում, և բոլոր նման հայտարարություններն օգտագործվում են որպես պատրվակ ՆԱՏՕ-ի ռազմական տեխնիկան Ռուսաստանի սահմանների մոտ տեղակայելու համար։