«Հայաստան» և «Պատիվ ունեմ» խմբակցությունները գնալու են դատարան` աջակցելու Առուշ Առուշանյանին. Սեյրան Օհանյան

Ժողովրդավարական արժեքներ դավանող միջազգային հանրության աչքի առաջ ակնհայտ բռնատիրության ձգտող ՀՀ իշխանությունների գործողություններով ապօրինի կալանավորվում են համայնքի ղեկավարներ, ավագանու անդամներ, իշխանության անօրինական ցանկությունը չկատարող դատավոր, իշխանության բազմաթիվ քննադատներ: ԱԺ այսօրվա նիստում հայտարարեց «Հայաստան» խմբակցության ղեկավար Սեյրան Օհանյանը և հիշեցրեց, որ ընդամենը երկու օր առաջ կրկին կալանավորվել է Քաջարանի քաղաքապետ Մանվել Փարամազյանը:

«Մենք դատապարտում ենք իշխանությունների այս ակնհայտ ապօրինի գործողությունները՝ գործող քաղաքապետերի, համայքների ղեկավարների նկատմամբ»,-ասաց «Հայաստան» խմբակցության ղեկավարը:

Նա հիշեցրեց, որ այսօր էլ Վերաքննիչ դատարանում քննվում է քաղբանտարկյալ, Գորիսի քաքաղապետ Առուշ Առուշանյանի խափանման միջոցի հարցը:

Սեյրան Օհանյանը նաև հայտարարեց, որ ընդդիմադիր երկու խմբակցությունների պատգամավորները գնալու են դատարան՝ ի աջակցություն Առուշ Առուշանյանի:

«Կոչ ենք անում մեր հայրենակիցներին մասնակցել այս պայքարին՝ հանուն իրավական ու ժողովրդավարական Հայաստանի»,-հայտարարեց «Հայաստան» խմբակցության ղեկավարը: