«Ռազբորկա» Երևանում` քոլեջի 16-ամյա սաների միջև. երկու դանակահարված կա

Երեկ՝ փետրվարի 2-ին, դանակահարության դեպք է տեղի ունեցել Երևանում։ Ժամը 14։50-ի սահմաններում թիվ 1 համալսարանական հիվանդանոցից ոստիկանության Քանաքեռ-Զեյթունի բաժին ահազանգ է ստացվել, որ «ձախ ազդրի հետին մակերեսի ծակած վերք» ախտորոշմամբ իրենց մոտ է տեղափոխվել մի քաղաքացի։ 5 րոպե անց նույն ոստիկանություն ահազանգ է ստացվել, այս անգամ՝ «Իզմիրլյան» բժշկական կենտրոնցից, ովքեր հայտնել են, որ «աջ կրծքավանդակի հատվածի կտրած-ծակած վերք» ախտորոշմամբ իրենց մոտ է տեղափոխվել մի քաղաքացի։  Թիվ 1 համալսարանական հիվանդանոց մեկնած ոստիկանության Քանաքեռ-Զեյթունի բաժնի օպերատիվ խումբը պարզել է, որ վիրավորը Կոտայքի մարզի բնակիչ՝ 18-ամյա Կ. Բաղոյանն է, իսկ մյուս օպերատիվ խումբը, մեկնելով «Իզմիրլյան» ԲԿ, պարզել է, որ վիրավորը Արմավիրի մարզի բնակիչ՝ 17-ամյա Ա. Հակոյանն է։  

Մինչ բժիշկները պայքարում էին վիրավորների կյանքի համար, ոստիկանության ծառայողները պարզել են դեպքի հանգամանքները։  Ըստ տեղեկությունների՝ նույն օրը, ժամը 13։40-ի սահմաններում Թբիլիսյան խճուղու հասցեներից մեկի տարածքում անձնական հարցի շուրջ վիճաբանություն է տեղի ունեցել մի կողմից Ա. Հակոբյանի, Կ. Բաղոյանի, Կոտայքի մարզի բնակիչ՝ 16-ամյա Ա. Ռուստամյանի, Գեղարքունիքի մարզի բնակիչ՝ 16-ամյա Վ. Վարդանյանի, Լոռու մարզի բնակիչ՝ 16-ամյա Գ. Գասպարյանի, մյուս կողմից՝ Երևանի բնակիչներ՝ 16-ամյա Կ. Սարգսյանի, 16-ամյա Ա. Գալստյանի, 16-ամյա Դ. Մուրադյանի միջև, որի ժամանակ վիճաբանությունը այնուհետև վերածվել է ծեծկռտուքի, և այդ ժամանակ Ա. Գալստյանը իր մոտ եղած դանակով հարվածել է Ա. Հակոբյանին և Կ. Ավեյանին։  Փաստի առթիվ ոստիկանության Քանաքեռ-Զեյթունի բաժնի հետաքննական բաժանմունքում նյութեր են նախապատրաստվում, հետաքննիչի որոշմամբ նշանակվել են մի շարք փորձաքննություններ, այդ թվում՝ դատաբժշկական։  Ոստիկանություն տեղափոխված բոլոր անձինք բաց են թողնվել։