Բայդենի դեմ Թրամփը խոստացել է կոռուպցիոն հետաքննություն իրականացնել
ԱՄՆ նախկին նախագահ Դոնալդ Թրամփը Տեխասում իր կողմնակիցների առջեւ ելույթ ունենալիս սպառնացել է սկսել կոռուպցիոն հետաքննություն իր իրավահաջորդ Ջո Բայդենի դեմ, երբ Կոնգրեսը վերադառնա հանրապետականների հսկողության ներքո, հաղորդում է ՌԻԱ Նովոստի-ն:
Թրամփը հույս է հայտնել, որ Հանրապետական կուսակցությունից իր գործընկերները կստանան մեծամասնություն ներկայացուցիչների պալատում եւ սենատում միջանկյալ ընտրությունների արդյունքում, որոնք կկայանան ընթացիկ տարվա նոյեմբերի 8-ին:
«Վստահ եղեք, որ, երբ հանրապետականները նորից հսկողություն սահմանեն կոնգրեսում, Բայդենի կոռուպցիան կհետաքննվի եւ ի ցույց կդրվի: Միլիոնավոր դոլարներ, որոնք Բայդենը վերցրել է Չինաստանից, նույնպես բացատրում են, թե ինչու է Ջոն հրաժարվել ներգրավել Չինաստանի կոմունիստական կուսակցությունը՝ ի պատասխան վիրուսի, որը տարածվել է մեր եւ աշխարհի շրջանում»,-խոստացել է նախկին նախագահը:
Սպիտակ տան ներկայիս ղեկավարը հերքել է իր որդի Հանթերի՝ բազմաթիվ օտարերկրյա բիզնես նախագծերի մասնակցության մեջ մեղադրանքները:
