Դումանյանը պատասխանեց ուսուցիչների համար բացասական հետևանքներ առաջացնելու Քյարամյանի առաջարկին
Մեր ուսուցիչները թող անհոգ լինեն, նրանք որևիցե խնդիր չունեն։ Նման հարց այսօր գոյություն չունի։ Լրագրողների հետ զրույցի ժամանակ ասաց ԿԳՄՍ նախարար Վահրամ Դումանյանը՝ անդրադառնալով կառավարության նիստի ժամանակ ՔԿ նախագահ Արգիշտի Քյարամյանի առաջարկին։
Նշենք, որ ՔԿ նախագահը նիստի ժամանակ հետաքրքրվել էր՝ արդյոք արժի ատեստավորումը չանցած ուսուցիչների համար բացասական հետևանքներ առաջացնել։
«Բոլոր ուսուցիչները թող մասնակցեն և ոգևորությամբ գան։ Այլ հարց է, որ ուսուցիչը բազմաթիվ անգամ գալիս է և չի ստացվում։ Ինձ թվում է՝ այստեղ արդեն բոլորս էլ հարց կտանք, թե ինչու չի ստացվում։ Ի վերջո 70 և ավելին է համարվում հաղթահարված շեմ և ենթադրենք մի ուսուցիչ հավաքել է 65 կամ 68, ի՞նչ խնդիր կա։ Որևիցե խնդիր չկա, բայց եթե մեկը եկել է և ստացել է 100-ից 10, մտածելու տեղ ունենք»,-նշեց Վահրամ Դումանյանը։
