Հայաստանի դրոշը ծածանվում է Հռոմի նախագահական պալատի վրա

Հռոմի Քվիրինալյան պալատի վրա բարձրացվել է Հայաստանի Հանրապետության պետական դրոշը: Դա կապված է ՀՀ նախագահ Արմեն Սարգսյանի պետական այցի հետ։ Գրում է NEWS.am-ը։

Իտալիայի  նախագահի նստավայրում՝ Քուիրինալե պալատում, այսօր՝ հոկտեմբերի 6-ին, տեղի ունեցավ Հայաստանի նախագահ Արմեն Սարգսյանի պաշտոնական դիմավորման արարողությունը։

Լրատվականը հայտնում է, որ նախագահին դիմավորել է Իտալիայի նախագահ Սերջո Մատարելլան։ Հնչեցին Հայաստանի եւ Իտալիայի պետական օրհներգերը, որից հետո Քուիրինալե պալատի վրա բարձրացվեց Հայաստանի պետական դրոշը։

Արարողության պաշտոնական մասից հետո մեկնարկեց երկու նախագահների առանձնազրույցը, որին կհաջորդի պատվիրակությունների հանդիպումն ընդլայնված կազմով: Հայաստանի և Իտալիայի նախագահները հանդես կգան մամուլի համար հայտարարությամբ:

Վերջին 30 տարիների ընթացքում առաջին անգամ Հայաստանի նախագահը պետական այց է կատարում Իտալիա։ Նախատեսված են հանդիպումներ Սենատի ղեկավար Մարիա Էլիզաբետա Կազելատիի, Պատգամավորների պալատի ղեկավար Ռոբերտո Ֆիկոյի, Հռոմի քաղաքապետ Վիրջինիա Ռաջիի հետ: