Մոռացե՞լ եք, որ արհամարհում էիք աշխարհաքաղաքականությունը ու անտեսում նույն Պուտինին, որին հիմա փառաբանում եք․ Վարդանյան
«Հայաստան» դաշինքի պատգամավոր Աղվան Վարդանյանն այսօր ԱԺ-ում ելույթի ժամանակ հակադարձեց իշխանության կողմից արված տարատեսակ հայտարարություններին, այդ թվում՝ ՔՊ-ական Ալեն Սիմոնյանի հայտարարություններին, գրում է Մամուլը։
«Բոլոր խնդիրներն ու մարտահրավերները մնում են և առաջիկայում խորանալու են: Կյանքը, հանրային հարաբերությունները շատ ավելի հարուստ ու անկանխատեսել են, քան երևում է Ձեր կառավարական, այդ թվում «001 SS» համարանիշով ավտոմեքենայի պատուհանից, պարոն Սիմոնյան»:
Այնուհետև քննելով իշխանության ղեկավարման 3 տարիները՝ Վարդանյանը շարունակեց.
«ՀՀ ինքնիշխանությունը վտանգել եք: Երկրի սահմանները չեք կարողանում պաշտպանել: Միջազգային ասպարեզում մեր պետությունը օբյեկտի եք վերածել: Դո՞ւք եք տարածաշրջանում խաղաղության դարաշրջան բերելու: Հետո ի՞նչ, որ ելույթներում փառաբանում եք Պուտինին, Մակրոնին, ԱՄՆ-ին, ԵՄ-ին, մոռացե՞լ եք, որ դարձյալ ժողովրդի մանդատով արհամարհում էիք աշխարհաքաղաքականությունը ու անտեսում նույն Պուտինին»:
