Իշխանության կողմից միտումնավոր ուռճացվում է պատերազմի վտանգը՝ ժողովրդին վախեցնելու և զիջումներն արդարացնելու համար. Աբրահամյան

Վերջին սահմանային զարգացումների հետ կապված մի քանի մտավախություն ունեմ, առաջին՝ Նիկոլ Փաշինյանն ուզում է աշխատեցնել այն թեզը, ինչն արվեց նոյեմբերի 9-ից հետո, այն է՝ եթե չզիջենք այդ տարածքները, ապա կարող է պատերազմ սկսվել։ Հիմա խնդիրը ոչ միայն այդ տարածքները զիջելու մեջ է, այլ նաև քաղաքական գործընթացում զիջումների գնալու։ Այս մասին «Փաստինֆո»-ի եթերում ասել է

«Հենակետ» վերլուծական կենտրոնի ղեկավար Տիգրան Աբրահամյանը։

Նրա դիտարկմամբ՝ Արցախի հարցից Հայաստանի գործող իշխանությունները քաղաքական առումով արդեն իսկ ձեռքերը լվացել է, իսկ հիմա կարող է լինել նաև դրա իրավական ամրագրումը։

Այսինքն՝ իշխանությունները նախ ուռճացնում են պատերազմի վտանգը, որպեսզի երկրորդ քայլով գնան այդ զիջումներին։

«Հիմնավորում միշտ էլ կա, եթե մենք այդ պահին չանեինք պատերազմ կլիներ, և, ցավոք, հասարակության մի մեծ զանգված հենց այդպես էլ ընդունում է։ Իր կառավարման ապիկարությունը նա քողարկում է պատերազմի վերսկսման մասին հանրությանը վախեցնելով»,- նշել է փորձագետը։