Հայկ Սարգսյանի՝ «Շիշ բռնողի» կողմից իր եկամուտի աղբյուրը թաքցնելու դեպքի առթիվ քրգործ չի հարուցվի. ՀՔԾ-ն մերժել է

ԱԺ «Իմ քայլը» խմբակցության պատգամավոր Հայկ Սարգսյանի՝ «Շիշ բռնողի» կողմից իր եկամտի աղբյուրները թաքցնելու, հայտարարագրում կեղծ տվյալներ ներառվելու դեպքի առթիվ քրգործի հարուցումը մերժվել է։

Ինչպես արդեն տեղեկացրել ենք՝ «Կոռուպցիայի կանխարգելման հանձնաժողովն» արձանագրել է, որ պատգամավորի 2018-ին ներկայացրած հայտարարագրում եկամուտների էական փոփոխությունը չի հիմնավորվել օրինական եկամտի աղբյուրներով, այսինքն՝ մինչ պաշտոն զբաղեցնելը նա այլ եկամուտ է ունեցել, իսկ դրանից հետո աճը եղել է չհիմնավորված, ինչն էլ կասկած է առաջացրել ու հաղորդում ներկայացրել դատախազություն։

ՀՀ գլխավոր դատախազությունը ներկայացված նյութերն ուղարկել է ՀՀ հատուկ քննչական ծառայություն՝ ՀՀ քրեական դատավարության օրենսգրքի 180-181-րդ հոդվածներով սահմանված կարգով նյութեր նախապատրաստելու համար, որտեղ, փաստորեն նախապատրաստված նյութերի հիման վրա մերժվել է քրեական գործի հարուցումը։

ՀՔԾ-ից «Փաստինֆո»-ի հարցին ի պատասխան հայտնեցին, որ նախապատրաստված նյութերի հիման վրա քննիչի կողմից որոշում է կայացվել քրեական գործի հարուցումը մերժելու մասին՝ հանցակազմի բացակայության հիմքով։