Ղրղզստանն ու Տաջիկստանը զորքերը ետ են քաշել սահմանից

Ղրղզստանն ու Տաջիկստանն ավարտին են հասցրել իրենց զինվորական ստորաբաժանումները սահմանից ետ քաշելու գործընթացը: Այս մասին հայտնում է ՏԱՍՍ-ը՝ հղում անելով ղրղզական կողմին:

Խոսքը մասնավորապես վերաբերում է լրացուցիչ ուժերին ու միջոցներին, որոնք սահմանին կենտրոնացվել էին վերջին բախումների ժամանակ:

Հավելենք, որ զորքերը ետ քաշելու մասին կողմերը հայտարարել էին մայիսի 1-ին:

Հիշեցնենք՝ ջրաբաշխիչ կետի պատկանելության շուրջ երկու հարևանների միջև վեճը շարունակվում է տասնամյակներ։ Տաջիկստանի և Ղրղզստանի պետական սահմաններն անցնում են հենց այդ ջրաբաշխիչ կետի կողքով, իսկ 1968 թվականից ի վեր այն օգտագործվում է ինչպես Տաջիկստանի և Ղրղըզստանի, այնպես էլ երրորդ հարևան Ուզբեկստանի սահմանամերձ շրջանների ոռոգման և ջրամատակարարման համար։