Նախկին փոխվարչապետը որոշ ընդհանրացումներ է ներկայացրել «ոչ հեռու, բայց մոռացված անցյալից»
ՀՀ նախկին փոխվարչապետ Արմեն Գևորգյանը գրառում է արել Տելեգրամի ալիքի իր էջում՝ միաժամանակ շնորհակալություն հայտնելով ապագայի բանաձևերի մասին իր հոդվածի վերաբերյալ «կառուցողական և հետաքրքիր» արձագանքների համար:
«Շատերին հետաքրքրում էր ներկայացված առաջարկների իրատեսությունը: Որպես օրինակ՝ ես կցանկանայի հակիրճ ներկայացնել որոշ ընդհանրացումներ մեր ոչ հեռու, բայց արդեն մոռացված անցյալից:
Այսպես․
2000-ականների սկզբին հնարավոր եղավ գտնել Հայաստանի համար արժանապատիվ խաղաղության և զարգացման պրագմատիկ բանաձևը․ հօգուտ Ռուսաստանի հիմնական ընտրությամբ՝ սահմանել Արևմուտքի հետ հարաբերությունների ճիշտ հավասարակշռություն։
2001 թ․-ից Վաշինգտոնն ու ԵՄ-ն դարձան Հայաստանում ներքին բարեփոխումների իրականացման հարցում հիմնական գործընկերները, և դա Մոսկվայի կողմից նորմալ էր ընկալվում։
Արդյունքում.
· Իրանից Հայաստան գազատար կառուցվեց՝ միաժամանակ պահպանելով կառուցողական հարաբերություններ և՛ Ռուսաստանի, և՛ ԱՄՆ-ի հետ։
· Հենց այդ բանաձևը Հայաստանին հնարավորություն տվեց միջազգային հարաբերությունների օրակարգ մտցնել Հայոց ցեղասպանության ճանաչման և դատապարտման հարցը։
· Այդպիսի հավասարակշռության շնորհիվ Հայաստանը, լինելով ՀԱՊԿ անդամ, ՆԱՏՕ-ի հետ կուտակեց հարաբերությունների հարուստ փորձ:
· Իշխանությունները կարողացան ակտիվորեն համագործակցել միջազգային ֆինանսական կազմակերպությունների հետ, Հայաստան բերել արևմտյան հիմնադրամներ և օտարերկրյա ներդրումներ։
· Հենց այդպիսի բալանսի շնորհիվ Հայաստանը կարողացավ ակտիվորեն մասնակցել Ռուսաստանի նախաձեռնած ինտեգրացիոն գործընթացներին, միաժամանակ դառնալ Եվրոպայի Խորհրդի, ԱՀԿ-ի անդամ և զարգացնել ԵՄ-ի հետ համագործակցությունը։
· Այդ բանաձևը թույլ էր տալիս զսպել մեր հարևանների ագրեսիան, ապահովում էր խաղաղությունը շփման գծում, սահմանափակում էր Ադրբեջանի հետ ռազմա-տեխնիկական ոլորտում Ռուսաստանի համագործակցությունը և Հայաստանը շրջանցող տարածաշրջանային որոշ ենթակառուցվածքային ծրագրերի իրագործումը։
Ի դեպ, վերջին հոդվածում Հնդկաստանի մասին առանձին չեմ գրել: Բայց ուզում եմ նշել, որ նաև Հնդկաստանի կառավարությունն է նպատակասլաց աշխատում Հյուսիս-Հարավ տրանսպորտային միջանցքի զարգացման ուղղությամբ: Այդ նպատակով նրանք ինտենսիվորեն զարգացնում են Օմանի ծովի ափին գտնվող՝ Չաբահար ազատ առևտրի գոտին», - գրել է նախկին փոխվարչապետը։
