Նոր մանրամասներ բլոգեր Շմավոն Աթոյանի սպանությունից
Բլոգեր Շմավոն Աթոյանի սպանության մեջ մեղադրվող երիտասարդը չի ընդունում դիտավորությամբ սպանության մեղադրանքը, հայտնել է նրա պաշտպան Հայկ Ալումյանը։
Փաստաբանի խոսքով՝ դեպքի օրը իր պաշտպանյալի վրա հարձակվել են մոտ հինգ անձինք, որոնց թվում եղել է նաև Աթոյանը։
«Ընդ որում՝ հարձակվողները եղել են դեմքերը տարբեր ձևերով փակած, դիմակ չեն կրել, գլխարկ, «կապիշոնով» մարդիկ են եղել: Տեսագրությունից երևում, որ այդ մարդիկ ձգտում են իրենց դեմքերը փակ պահել: Նրանցից մեկը՝ սպանվածը, նույնպես այդպես էր։ Մեզ այդ անձինք դեռ հայտնի չեն, և չգիտեմ՝ վարույթ իրականացնող մարմինը նրանց բացահայտե՞լ է, թե ոչ», - նշել է Ալումյանը։
Նրա խոսքով՝ մեղադրյալը կրակել է գետնին՝ ինքնապաշտպանության նպատակով, ոչ թե որևէ մեկի ուղղությամբ։
Փաստաբանն ընդգծել է, որ գործը քաղաքական ենթատեքստ չունի։
«Չգիտեմ՝ ինչու են փորձում քաղաքականացնել դեպքը․ իմ պաշտպանյալը որևէ կապ չունի քաղաքականության հետ»,– ասել է Ալումյանը։
