7 երգ գիտի, 7-ն էլ մեղրի մասին. Դավոյանը՝ Սերժ Սարգսյանի մասին
Ազգային ժողովի «Քաղաքացիական պայմանագիր» խմբակցության պատգամավոր Արփի Դավոյանը «Ֆեյսբուք»-ի իր էջում գրառում է արել՝ անդրադառնալով Սերժ Սարգսյանի վերջին հարցազրույցին։
Նրա խոսքով՝ Սերժ Սարգսյանի հարցազրույցը, որը պիտի մեծ արձագանք ունենար, այդպես էլ չցնցեց համացանցը։ Դավոյանի ձևակերպմամբ՝ «արջը 7 երգ գիտի, 7-ն էլ մեղրի մասին», ընդգծելով, որ նախկին նախագահն այլևս այն մարզավիճակում չէ, երբ յուրաքանչյուր խոսք կարող էր նպատակին հասնել։
Պատգամավորը նշել է, որ ցավալի է՝ Հայաստանի քաղաքացիների նկատմամբ մակերեսային վերաբերմունք ունեցող և բանակցային գործընթացի մասին մեծ մասնագետի տոնով խոսող պաշտոնաթող նախագահը շարունակում է խեղաթյուրել բանակին վերաբերող փաստերը։ Դավոյանի կարծիքով՝ Սարգսյանի խոսքում ապագայի որևէ ուրվագիծ չկա։
Նա եզրափակել է, որ «Սերժ Սարգսյանի բոլոր գնացքներն անվերադարձ գնացել են, և ոչ մի ապաշրջափակում նրան այլևս չի օգնի»։
